Financial Times-მა, ირანის საგარეო საქმეთა მინისტრზე დაყრდნობით, გაავრცელა ინფორმაცია, რომ აშშ-მა უნდა დათანხმდეს იმ ზიანის ანაზღაურებას, რომელიც ირანს გასულ თვეს კონფლიქტის დროს მიადგა.

თეირანში Financial Times-თან (FT) ინტერვიუში აბას არაღჩიმ განაცხადა: „მათ უნდა ახსნან, თუ რატომ დაგვესხნენ თავს მოლაპარაკებების დროს და მოგვცენ გარანტია, რომ ეს მომავალი მოლაპარაკებებისას არ განმეორდება. და მათ უნდა აანაზღაურონ ის ზიანი, რომელიც (ირანს) მიაყენეს“.

სტატიაში ნათქვამია, რომ არაღჩი და აშშ-ის სპეციალური წარმომადგენელი სტივ ვიტკოფი კონფლიქტის დროს და მის შემდეგ ერთმანეთს შეტყობინებებს უცვლიდნენ. ირანელმა ოფიციალურმა პირმა თავის ამერიკელ კოლეგასთან ხაზგასმით აღნიშნა „ყველასთვის მომგებიანი გადაწყვეტილების“ აუცილებლობა, რათა დასრულდეს ირანის ბირთვულ პროგრამასთან დაკავშირებული ხანგრძლივი ჩიხური მდგომარეობა.

FT-ის თანახმად, ირანის მთავარმა მომლაპარაკებელმა ბირთვულ საკითხებში განაცხადა, რომ ეს უნდა მოიცავდეს ფინანსურ კომპენსაციას და გარანტიებს, რომ ირანზე მოლაპარაკებების დროს განმეორებითი თავდასხმა არ მოხდება, თუმცა ამ საკითხზე დამატებითი დეტალები არ დაუკონკრეტებია.

გასულ თვეს აშშ-მა ირანის ბირთვულ ობიექტებზე თავდასხმები განახორციელა, რომლებზეც ვაშინგტონი აცხადებს, რომ ისინი ბირთვული იარაღის შემუშავების პროგრამის ნაწილია.

თეირანი კი, თავის მხრივ, აცხადებს, რომ მისი ბირთვული პროგრამა მშვიდობიან მიზნებზეა ორიენტირებული და იარაღს არ ქმნის.

თეთრმა სახლმა და აშშ-ის სახელმწიფო დეპარტამენტმა Reuters-ის თხოვნა, გაეკეთებინათ კომენტარი ამ საკითხზე, უპასუხოდ დატოვეს.