უკრაინის პრეზიდენტმა ვოლოდიმირ ზელენსკიმ განაცხადა, რომ უსაფრთხოებისა და სამართლებრივი პირობების უზრუნველყოფის შემთხვევაში, საპრეზიდენტო არჩევნების 60-90 დღეში ჩასატარებლად „მზად არის“ და აშშ-სა და ევროპელ პარტნიორებს სთხოვა, დაეხმარონ საომარი მოქმედებების პირობებში არჩევნებისთვის აუცილებელი გარემოს შექმნაში.
ეს განცხადება მას შემდეგ გაკეთდა, რაც აშშ-ის პრეზიდენტმა დონალდ ტრამპმა სამშაბათს ეს საკითხი საჯაროდ გააჟღერა.
რომში ჟურნალისტებთან საუბრისას ზელენსკიმ ხაზგასმით აღნიშნა, რომ აშშ-ის ოფიციალურ პირებთან ბოლო კონტაქტებისას ეს საკითხი არ განხილულა და რომ არჩევნებთან დაკავშირებული გადაწყვეტილებები მხოლოდ უკრაინელების მისაღებია.
ზელენსკიმ უარყო ბრალდებები, თითქოს კიევი პოლიტიკური მიზეზებით არიდებს თავს არჩევნებს და განაცხადა, რომ ომის გაგრძელება არ არის დამოკიდებული იმაზე, თუ ვინ არის თანამდებობაზე.
უკრაინის ლიდერმა ხაზგასმით აღნიშნა, რომ რუსეთის თავდასხმების მიუხედავად, უსაფრთხო პირობების გარდა, ლეგიტიმურობის უზრუნველსაყოფად და ფრონტის ხაზზე მყოფი სამხედროების მონაწილეობის დასაშვებად, ასევე აუცილებელია საკანონმდებლო რეგულაციები.
ზელენსკიმ აშშ-სა და ევროპელ პარტნიორებს სთხოვა, დაეხმარონ უკრაინას აუცილებელი უსაფრთხო გარემოს შექმნაში და აღნიშნა, რომ მხარდაჭერის შემთხვევაში, ქვეყანა მზად იქნება არჩევნები ორ-სამ თვეში ჩაატაროს.
ზელენსკიმ ასევე დასძინა, რომ თავად სრულ მზადყოფნაშია არჩევნებში მონაწილეობისთვის და დეპუტატებს სთხოვა, მოამზადონ კანონპროექტი იმ ცვლილებების შესახებ, რომლებიც ომის დროს არჩევნების ჩატარებას შესაძლებელს გახდის.
მან ასევე აღნიშნა, რომ კიევში დაბრუნების შემდეგ გეგმავს, განიხილოს პარტნიორებისა და პარლამენტისგან მიღებული წინადადებები.
უკრაინის სამშვიდობო გეგმა
უსაფრთხოების უფრო ფართო საკითხებზე საუბრისას, ზელენსკიმ დაადასტურა, რომ კიევი საბოლოო სამშვიდობო გეგმას ვაშინგტონს ოთხშაბათს გადასცემს.
უკრაინის ლიდერმა ასევე განაცხადა, რომ მისმა ქვეყანამ უკვე განათავსა შორი მოქმედების სისტემები, მათ შორის რაკეტები: „ნეპტუნი“, „პალიანიცია“, „ფლამინგო“ და „საფსანი“.
ყირიმის საკითხსაც შეეხო რა, ზელენსკიმ აღიარა, რომ უკრაინას ამჟამად არ გააჩნია ნახევარკუნძულის დასაბრუნებლად საჭირო სამხედრო შესაძლებლობები.
ტრამპის კომენტარების საპასუხოდ ზელენსკიმ განაცხადა: „შესაძლოა, ეს ჩვენი პირველი შეხვედრისას ვთქვი და ვფიქრობ, მართალიც ვიყავი. დიახ, დღეს ჩვენ არ გვაქვს ძალა, რომ ეს ყველაფერი გავაკეთოთ. ამ ყველაფრისთვის საკმარისი მხარდაჭერა არ გაგვაჩნია“.
ზელენსკიმ დასძინა, რომ თუ რუსეთი მზად იქნება „ენერგეტიკული ცეცხლის შეწყვეტისთვის“, კიევი ამ საკითხის განხილვისთვის მზად არის და აღნიშნა, რომ ენერგეტიკული სტაბილურობა „ხალხისთვის მნიშვნელოვანია“.
უკრაინის პრეზიდენტმა ხაზგასმით აღნიშნა, რომ სამშვიდობო გეგმის ევროპასთან დაკავშირებული ელემენტები, მათ შორის გაყინული რუსული აქტივებისა და უკრაინის ევროკავშირში წევრობის საკითხები, „ევროპის მიერ უნდა იყოს მიღებული“.
