სამხრეთ კორეის საზღვაო სარდალი გადატრიალების გამო გადააყენეს

სააგენტო „იონჰაპი“ ოთხშაბათს წყაროებზე დაყრდნობით იტყობინება, რომ სამხრეთ კორეის სამხედრო-საზღვაო ძალების მთავარსარდალს, ადმირალ კანგ დონგ-გილს, ერთთვიანი დისციპლინური სასჯელი — თანამდებობიდან ჩამოშორება დაეკისრა ყოფილი პრეზიდენტის, იუნ სოკ იოლის მიერ 2024 წლის ბოლოს საომარი მდგომარეობის გამოცხადების წარუმატებელ მცდელობაში მისი სავარაუდო როლის გამო.

გავრცელებული ინფორმაციით, გადაწყვეტილება მიღებული იქნა მას შემდეგ, რაც თავდაცვის სამინისტრომ პარასკევს გამართა სადისციპლინო კომიტეტის სხდომა კანგის მიმართ სასჯელის განსაზღვრის მიზნით; აღნიშნული სხდომა მოჰყვა ბრალდებებს იმის შესახებ, რომ 2024 წლის 3 დეკემბრის ღამეს კანგი საომარი მდგომარეობის სარდლობის ჩამოყალიბებას ეხმარებოდა.

ამ ბრალდებების გამო კანგი თანამდებობიდან გასულ თვეში უკვე იყო ჩამოშორებული.

საომარი მდგომარეობის გამოცხადების დროს კანგი გაერთიანებული შტაბების სამხედრო მხარდაჭერის დირექტორატის ხელმძღვანელის პოსტს იკავებდა.

მანამდე ოფიციალურმა პირებმა განაცხადეს, რომ ექვსთვიანი გამოძიების ფარგლებში, 24 სამხედრო სარდლობისა და ქვედანაყოფიდან დაახლოებით 860 გენერალი და ოფიცერი შემოწმდა, რის შედეგადაც გამოვლინდა დაახლოებით 180 პირი, რომლებიც ამ მცდელობაში პირდაპირ ან ირიბად მონაწილეობდნენ.

სამინისტრომ ასევე დაადგინა, რომ ხანმოკლე საომარი მდგომარეობის დროს მობილიზებული იყო დაახლოებით 1 580 სამხედრო მოსამსახურე.