ისრაელის არმიის რადიოს ცნობით, აშშ-ის პრეზიდენტმა დონალდ ტრამპმა ისრაელის პრემიერ-მინისტრ ბენიამინ ნეთანიაჰუსთან პირდაპირი კონტაქტის გაწყვეტის გადაწყვეტილება მიიღო.

ისრაელის არმიის რადიოს კორესპონდენტმა იანირ კოზინმა X-ის ანგარიშზე გამოქვეყნებულ პოსტში აღნიშნა, რომ ტრამპმა ეს გადაწყვეტილება მას შემდეგ მიიღო, რაც მისმა ახლო თანამშრომლებმა ისრაელის სტრატეგიულ საკითხთა მინისტრ რონ დერმერს უთხრეს, რომ პრეზიდენტი მიიჩნევს, თითქოს ნეთანიაჰუ მას მანიპულაციას უწევს.

ისრაელელმა ოფიციალურმა პირმა ასევე დასძინა, რომ დერმერის ტონი, რომელიც მან გამოიყენა რესპუბლიკელ მაღალჩინოსნებთან ბოლო მოლაპარაკებებისას იმის თაობაზე, თუ რა უნდა გაეკეთებინა ტრამპს, ამპარტავნულად და უსარგებლოდ იქნა აღქმული.

ოფიციალურმა პირმა თქვა, რომ ტრამპის გარემოცვამ მას უთხრა: „ნეთანიაჰუ მასზე მანიპულირებს“.

„ტრამპისთვის არაფერია იმაზე საძულველი, ვიდრე სულელად ან მოტყუებულად გამოჩნდეს. ამიტომ გადაწყვიტა ნეთანიაჰუსთან კონტაქტის გაწყვეტა,“ – დასძინა მან.

კოზინმა აშშ-ისრაელის ურთიერთობების გაუარესების ერთ-ერთ მიზეზად ისრაელის მთავრობის მიერ ირანისა და იემენელი ჰუსიტების საკითხზე კონკრეტული გეგმისა და ვადების წარუდგენლობა დაასახელა.

არმიის რადიოს კორესპონდენტმა ასევე ხაზგასმით აღნიშნა, რომ ნეთანიაჰუს მთავრობამ ღაზის საკითხზეც ვერ შეძლო კონკრეტული წინადადების წარდგენა.