ირანმა მოსადის ჯაშუშობის ბრალდებით ერთი პირი სიკვდილით დასაჯა

ირანის სასამართლო ხელისუფლების საინფორმაციო სააგენტო „მიზანის“ (Mizan) ოთხშაბათის ცნობით, ირანმა სიკვდილით დასაჯა პირი, რომელიც ისრაელის სასარგებლოდ ჯაშუშობაში იქნა დადანაშაულებული. ცნობილი გახდა, რომ მსჯავრდებულის სახელია ალი არდესტანი.

ირანმა, რომელიც ათწლეულებია ისრაელთან ფარულ ომში იმყოფება, სიკვდილით დასაჯა მრავალი ადამიანი, რომლებსაც ისრაელის დაზვერვასთან კავშირსა და ირანის შიგნით ოპერაციების განხორციელებაში დახმარებაში სდებდა ბრალს.

„ალი არდესტანის მიმართ გამოტანილი სასიკვდილო განაჩენი ირანის სენსიტიური ინფორმაციის მოსადისთვის გადაცემის გზით ჯაშუშობისთვის, უზენაესი სასამართლოს დასტურისა და სამართლებრივი პროცედურების გავლის შემდეგ აღსრულდა“, - ნათქვამია „მიზანის“ განცხადებაში.

ორ დიდი ხნის მტერ ქვეყანას შორის დაძაბულობის ესკალაციის პარალელურად, ისრაელის სასარგებლოდ ჯაშუშობაში ბრალდებული ირანელების სიკვდილით დასჯის შემთხვევები გახშირდა.

წლების განმავლობაში მიმდინარე ფარული თავდასხმების, კიბეროპერაციებისა და „მარიონეტული ომების“ შემდეგ, ორ ქვეყანას შორის არსებული დაპირისპირება გასულ ივნისში პირდაპირ კონფლიქტში გადაიზარდა, როდესაც აშშ-ის მხარდაჭერით ისრაელმა ირანის ბირთვულ ობიექტებზე იერიში მიიტანა.

მას შემდეგ ირანის ხელისუფლებამ გაამკაცრა შიდა უსაფრთხოების ზომები, რაც მოიცავს მოსადთან თანამშრომლობაში ბრალდებული პირების დაპატიმრებისა და სიკვდილით დასჯის შემთხვევების მკვეთრ ზრდას. ამის მიზანია ჯაშუშური საქმიანობის აღკვეთა და ეროვნული უსაფრთხოების განმტკიცება რეგიონული დაძაბულობის ფონზე.