რუსეთმა ჩრდილოეთ კორეის მიმართულებით პირდაპირი კომერციული ფრენები დაიწყო, რაც აზიელ მოკავშირესთან, რომელიც უკრაინაში მის აგრესიას უჭერს მხარს, კავშირების გაძლიერების დემონსტრირებაა.
პირველი რეისი მოსკოვი-ფხენიანი, რომელსაც რუსული ავიაკომპანია Nordwind Airlines-ი ასრულებს, კვირას, მოსკოვის შერემეტიევოს აეროპორტიდან გრინვიჩის დროით 16:25 საათზე 400-ზე მეტი მგზავრით აფრინდა.
რუსეთის ტრანსპორტის სამინისტროს განცხადებით, მოთხოვნის დასაკმაყოფილებლად რეისები თვეში ერთხელ შესრულდება.
ამ თვის დასაწყისში რუსეთის საგარეო საქმეთა მინისტრი სერგეი ლავროვი ჩრდილოეთ კორეის ლიდერთან, კიმ ჩენ ინთან, შესახვედრად ჩრდილოეთ კორეის ახალ სანაპირო კურორტ ვონსან-კალმას ეწვია. ლავროვმა აღნიშნა, რომ რუს ტურისტებს ამ კომპლექსის მონახულებისკენ მოუწოდებდა.
კურორტი, რომელსაც დაახლოებით 20 ათასი ადამიანის მიღება შეუძლია, კიმის მცდელობების ცენტრშია, გაზარდოს ტურიზმი ქვეყნის მძიმე ეკონომიკური მდგომარეობის გასაუმჯობესებლად.
ჩრდილოეთ კორეა პანდემიის დროს დაწესებულ შეზღუდვებს თანდათანობით ხსნის და საზღვრებს ეტაპობრივად აღებს. თუმცა, ქვეყანას ჯერ არ გაუკეთებია განცხადება, სრულად განაახლებს თუ არა საერთაშორისო ტურიზმს.
ავიაკომპანია Nordwind Airlines-მა, რომელსაც ევროკავშირის მიერ რუსულ ფრენებზე დაწესებულ აკრძალვამდე რუსი ტურისტები ევროპის კურორტებზე გადაჰყავდა, ბილეთის ფასი 570 დოლარად განსაზღვრა.
Nordwind-ის თანამშრომელმა, ოლეგმა, რომელიც რეისს ხელმძღვანელობდა, მაგრამ სრული სახელის დასახელება არ ისურვა, აეროპორტში AFP-სთან საუბრისას განაცხადა: „ეს არის ისტორიული მოვლენა, რომელიც აძლიერებს ჩვენს ერებს შორის კავშირებს.“
რუსეთის ტრანსპორტის მინისტრის მოადგილემ, ვლადიმერ პოტეშკინმა, სამინისტროს Telegram-ის არხზე გამოქვეყნებულ პოსტში აღნიშნა: „ჩვენი დიპლომატიური ურთიერთობების 70-წლიან ისტორიაში პირველად ვიწყებთ პირდაპირ ფრენებს ჩვენი ქვეყნების დედაქალაქებს შორის“.
რუსეთის სახელმწიფო საინფორმაციო სააგენტო TASS-ის ცნობით, პირველი საპასუხო რეისი ფხენიანიდან მოსკოვის მიმართულებით სამშაბათს შესრულდება.
რუსეთმა და ჩრდილოეთ კორეამ 17 ივნისს განაახლეს 2020 წელს, კოვიდ-19-ის პერიოდში, შეჩერებული სარკინიგზო მიმოსვლა.
ბოლო წლებში ორმა ქვეყანამ სამხედრო სფეროში უფრო მჭიდრო ურთიერთობები დაამყარა და გავრცელებული ინფორმაციით, ფხენიანი რუსეთს უკრაინაში სამხედრო ოპერაციებისთვის ჯარისკაცებითა და იარაღით ამარაგებს.
გასულ წელს, რუსეთის პრეზიდენტის, ვლადიმერ პუტინის, ჩრდილოეთ კორეაში ვიზიტისას, ორმა ქვეყანამ ხელი მოაწერა თავდაცვის სფეროში ურთიერთდახმარების პაქტს.
აპრილში ჩრდილოეთ კორეამ პირველად დაადასტურა, რომ თავისი ჯარისკაცების ნაწილი უკრაინის ფრონტის ხაზზე რუსულ შენაერთებთან ერთად განათავსა.
