უკრაინის პრეზიდენტმა ვოლოდიმირ ზელენსკიმ განაცხადა, რომ მათ იერიში მიიტანეს ფრონტის ხაზიდან 1000 კილომეტრის დაშორებით მდებარე რუსულ ნავთობგადამამუშავებელ ქარხანასა და რაკეტმზიდ რუსულ Tu-95MS ტიპის თვითმფრინავზე.
ვოლოდიმირ ზელენსკიმ სოციალურ ქსელში უკრაინის თავდაცვის ძალების მიერ ბოლო 24 საათის განმავლობაში განხორციელებული იერიშების შესახებ ინფორმაცია გაავრცელა.
ზელენსკიმ განაცხადა, რომ მათ რუსეთის იაროსლავლის ოლქში მდებარე ნავთობგადამამუშავებელ ქარხანაზე მიიტანეს იერიში: „მანძილი ფრონტის ხაზიდან 1000 კილომეტრია. ასევე გვქონდა სამართლიანი პასუხი შავ ზღვაში რუსეთის ომზე“.
ზელენსკიმ ასევე აღნიშნა, რომ უკრაინის არმიამ რუსეთის ქალაქ ენგელსში რაკეტმზიდ Tu-95MS ტიპის თვითმფრინავზეც მიიტანა იერიში: „ეს ის თვითმფრინავებია, რომლებიც უკრაინაზე თავდასხმებს ახორციელებენ. მადლობას ვუხდი ყველა ჩვენს მებრძოლს სიზუსტისთვის. ეს ყველაფერი მათი თავდასხმების საპასუხო ნაბიჯია. რუსებმა უნდა იგრძნონ, როგორია მათივე ომი“.
„სლავნეფტ-იანოსის“ ქარხანა, რომელსაც, გავრცელებული ცნობით, უკრაინის არმიამ FP-1 ტიპის დრონით დაარტყა, რუსეთის ფედერაციაში ერთ-ერთ უმსხვილეს ნავთობგადამამუშავებელ საწარმოს წარმოადგენს. ობიექტში, რომლის წლიური გადამუშავების სიმძლავრე დაახლოებით 15 მილიონი ტონა ნავთობია, იწარმოება ბენზინი, დიზელი, საავიაციო საწვავი და სხვა ნავთობპროდუქტები.
