რუსეთის საგარეო საქმეთა სამინისტრომ განაცხადა, რომ სომხეთში თავისი ელჩი კონსულტაციებისთვის მოსკოვში გაიწვია.
სამინისტროს მიერ გავრცელებულ განცხადებაში აღნიშნულია, რომ რუსეთის ელჩი ერევანში, სერგეი კოპირკინი, კონსულტაციებისთვის მოსკოვში იქნა გამოძახებული.
განცხადებაში ნათქვამია, რომ ეს დაკავშირებულია სომხეთის ხელისუფლების მიერ ევროკავშირთან დაახლოებისკენ გადადგმულ ნაბიჯებთან: „ეს ნაბიჯები ზიანს აყენებს თანამშრომლობას ევრაზიის ეკონომიკური კავშირის (EAEU) ფარგლებში“.
რუსეთის საგარეო საქმეთა სამინისტროს პრესსპიკერმა, მარია ზახაროვამ გასულ კვირას გაკეთებულ განცხადებაში აღნიშნა, რომ სომხეთის ევროკავშირთან დაახლოება ასუსტებს ორმხრივ ურთიერთობებსა და სატრატეგიულ პარტნიორობას: „სომხეთის ხელისუფლების მიდგომა ევრაზიის ეკონომიკურ კავშირში დარჩენასთან დაკავშირებით, მაშინ როდესაც ევროკავშირთან დაახლოების პროცესი გრძელდება, რუსული მხარისთვის მიუღებელია“.
რუსეთის პრეზიდენტმა ვლადიმერ პუტინმა ასევე თქვა, რომ თუ სომხეთი ევროკავშირში გაწევრიანდება, რუსეთის ბაზარზე გაგზავნილ სოფლის მეურნეობის პროდუქტებზე ევრაზიის ეკონომიკური კავშირის სტანდარტები აღარ გავრცელდება.
პუტინმა სომხეთში არსებულ ვითარებასთან დაკავშირებით უკრაინის მაგალითი მოიყვანა და აღნიშნა: „უკრაინის კრიზისი თავის დროზე უკრაინის ევროკავშირში გაწევრიანების მცდელობებით დაიწყო“.
