პოლონეთის შეიარაღებული ძალების ინფორმაციით, რუსეთის მიერ უკრაინის დასავლეთ ნაწილში, პოლონეთის საზღვართან ახლოს მდებარე რეგიონებზე განხორციელებული საჰაერო თავდასხმების შემდეგ, საჰაერო სივრცის უსაფრთხოების უზრუნველსაყოფად რეგიონში ავიაცია გაიგზავნა.
ოპერატიულმა სარდლობამ ოთხშაბათს პლატფორმა X-ზე გამოქვეყნებულ განცხადებაში აღნიშნა: „ჰაერში აიჭრნენ სწრაფი რეაგირების გამანადგურებელთა წყვილები და ადრეული შეტყობინების თვითმფრინავი, ხოლო სახმელეთო საჰაერო თავდაცვისა და სარადარო სისტემები უმაღლესი მზადყოფნის რეჟიმშია გადაყვანილი“.
გრინვიჩის დროით (GMT) 04:00 საათისთვის, რუსული სარაკეტო და უპილოტო საფრენი აპარატებით თავდასხმის შესახებ უკრაინის საჰაერო ძალების გაფრთხილების შემდეგ, თითქმის მთელ უკრაინაში საჰაერო განგაში გამოცხადდა.
პოლონეთის საჰაერო ნავიგაციის მომსახურების სააგენტომ (PANSA) განაცხადა, რომ ქვეყნის სამხრეთ-აღმოსავლეთ ნაწილში ჟეშუვისა და ლუბლინის აეროპორტები დროებით დაიხურა.
„სამხედრო ავიაციის მოქმედების თავისუფლების უზრუნველსაყოფად, ჟეშუვისა და ლუბლინის აეროპორტები დროებით დაიხურა“, - ნათქვამია PANSA-ს განცხადებაში.
