ირანის ნახევრად ოფიციალური საინფორმაციო სააგენტო „თასნიმის“ (Tesnim) ცნობით, ექრემინიამ დღის წესრიგთან დაკავშირებით განცხადებები გააკეთა.
მან აღნიშნა, რომ აშშ და ისრაელი სათანადოდ არ აფასებენ ირანის სამხედრო ძალასა და წინააღმდეგობის გაწევის ნებას.
ექრემინიამ, რომელიც ამტკიცებს, რომ ირანის შეიარაღებული ძალები ომს წარმატებით მართავენ, განაცხადა: „ამიერიდან იმ ქვეყნებს, რომლებიც ირანის წინააღმდეგ აშშ-ის სანქციებს ემორჩილებიან, ჰორმუზის სრუტეში გავლისას ნამდვილად შეექმნებათ პრობლემები“.
ექრემინიამ აღნიშნა, რომ აშშ საზღვაო ბლოკადასთან ერთად ფსიქოლოგიური ომის წარმოებასაც ცდილობს, თუმცა, ამის მიუხედავად, ირანის კონტროლი ჰორმუზის სრუტეზე არ შესუსტებულა. მან დასძინა: „ანგარიშების თანახმად, ჩვენი საზღვაო ვაჭრობა შეუფერხებლად გრძელდება. დაკავებულია გემების შეზღუდული რაოდენობა, რის საპასუხოდაც ჩვენ სიონისტური რეჟიმის (ისრაელის) გემები დავაკავეთ“.
ექრემინიამ განაცხადა, რომ ისინი არ ენდობიან აშშ-სთან მიღწეულ ცეცხლის შეწყვეტის შეთანხმებას, რის გამოც აგრძელებენ სამხედრო მზადებას და აახლებენ სამიზნეების სიას. მან აღნიშნა:
„ომის პირველ დღეებში ირანის სამხედრო-საჰაერო ძალების გამანადგურებლებმა ქუვეითსა და ერაყში მდებარე აშშ-ის ბაზებზე ოპერაციები ჩაატარეს და წარმატებით დაბრუნდნენ ირანში. ჩვენი F-5 ტიპის გამანადგურებლები ქვეყანაში უვნებლად დაბრუნდნენ, თუმცა Su-24 ტიპის თვითმფრინავები უკან დაბრუნებისას დაზიანდნენ“.
„მსუბუქი წყალქვეშა ნავები მზადყოფნაშია“
მეორე მხრივ, ირანის სამხედრო-საზღვაო ძალების სარდალმა, კონტრადმირალმა შაჰრამ ირანიმ განაცხადა, რომ მსუბუქი წყალქვეშა ნავები ჰორმუზის სრუტის ქვეშ შესაძლო საფრთხეებისა და მუქარის წინააღმდეგ მზადყოფნაში არიან.
ირანიმ აღნიშნა, რომ სამხედროებს შორის ამ წყალქვეშა ნავებს „სპარსეთის (ბასრის) ყურის დელფინებს“ უწოდებენ და დასძინა, რომ ეს ხომალდები დროდადრო წყლის ზედაპირზე ამოდიან და მანევრებს ასრულებენ.
