კონგოს დემოკრატიული რესპუბლიკის აღმოსავლეთით მდებარე იტურის პროვინციაში, ADF-ის მეამბოხეების მიერ განხორციელებული თავდასხმის შედეგად, სულ მცირე 21 ადამიანი დაიღუპა.
რეგიონის ადმინისტრაციის ხელმძღვანელის მოადგილის, პოლკოვნიკ მაქსიმ ჩიშიმბის განცხადებით, მამბასას რაიონის სოფელ ბიაკატოში მომხდარი თავდასხმის შემდეგ მრავალი ადამიანი დაკარგულად ითვლება.
კვირას ჩატარებული სამძებრო სამუშაოების შემდეგ კიდევ რამდენიმე ცხედრის პოვნის შედეგად, დაღუპულთა რიცხვი გასულ კვირას გამოცხადებული 15-დან 21-მდე გაიზარდა.
ჩიშიმბიმ აღნიშნა, რომ კონგოს არმიამ თავდამსხმელების დასაკავებლად ოპერაცია დაიწყო და მოსახლეობას ჯართან თანამშრომლობისკენ მოუწოდა.
მეამბოხეებმა, ზოგიერთი მშვიდობიანი მოქალაქის გატაცებამდე, დააზიანეს მოტოციკლები და სახლები.
მეამბოხეთა ჯგუფი, რომელიც რამდენიმე წელია კონგოს აღმოსავლეთში მოქმედებს, დაკავშირებულია ტერორისტულ ორგანიზაცია დაეშთან.
კონგოს აღმოსავლეთი რეგიონები თითქმის ოცდაათი წელია სხვადასხვა შეიარაღებული ჯგუფის მიერ გამოწვეული დაუცველობის წინაშე დგას. რეგიონში ათასობით ადამიანი ჩრდილოეთ კივუსა და იტურის ბანაკებში ცხოვრობს.
ორგანიზაცია „საერთაშორისო ამნისტიამ“ (Amnesty International) გასულ კვირას გამოქვეყნებულ ანგარიშში აღნიშნა, რომ მშვიდობიანი მოსახლეობა იტანჯება ადამიანის უფლებების დარღვევების ზრდისგან, რაც ომის დანაშაულებამდეც კი აღწევს.
„საერთაშორისო ამნისტიის“ გენერალურმა მდივანმა, აგნეს კალამარმა განაცხადა: „კონგოს დემოკრატიული რესპუბლიკის აღმოსავლეთში მშვიდობიანი მოქალაქეები ADF-ის მებრძოლების მხრიდან დიდ სისასტიკეს დაექვემდებარნენ. მათ კლავდნენ, იტაცებდნენ და აწამებდნენ არაადამიანური მოპყრობის კამპანიის ფარგლებში“.
ანგარიში ასევე ყურადღებას ამახვილებს აღმოსავლეთში მოქმედ სხვა ჯგუფზე, M23-ის მეამბოხეებზე, და აღნიშნავს, რომ დანაშაულები ფართო მასშტაბით არის ჩადენილი.
უგანდისა და კონგოს ძალები 2021 წლიდან მოყოლებული მეამბოხეების წინააღმდეგ ერთობლივ ოპერაციებს ატარებენ.
