ადგილობრივი მედიის ცნობით, აშშ-ის პრეზიდენტის, დონალდ ტრამპის ადმინისტრაცია სახელმწიფო დეპარტამენტის ბიუჯეტის თითქმის განახევრებას გეგმავს.
ორშაბათს Washington Post-ის მიერ პირველად გამოქვეყნებული შიდა დოკუმენტის თანახმად, 2026 ფისკალური წლისთვის შემოთავაზებულ ბიუჯეტში აშშ-ის სახელმწიფო დეპარტამენტისა და საერთაშორისო განვითარების სააგენტოსთვის (USAID) 28,4 მილიარდი დოლარის გამოყოფა იგეგმება. ეს თანხა 2025 წლისთვის კონგრესის მიერ დამტკიცებულ ბიუჯეტზე 27 მილიარდი დოლარით ნაკლებია.
აღნიშნული დოკუმენტის თანახმად, გათვალისწინებულია ჰუმანიტარული დახმარების ხარჯების 54%-ით, ხოლო გლობალური ჯანდაცვის ფონდების 55%-ით შემცირება.
იგეგმება ნატოსა და გაეროს ჩათვლით 20 საერთაშორისო ორგანიზაციისთვის მხარდაჭერის სრულად შეწყვეტა, თუმცა გაგრძელდება მიზნობრივი შენატანები ზოგიერთი ორგანიზაციისთვის, როგორიცაა ატომური ენერგიის საერთაშორისო სააგენტო და სამოქალაქო ავიაციის საერთაშორისო ორგანიზაცია.
გავრცელებული ინფორმაციით, ჰუმანიტარული დახმარება 54%-ით, ხოლო გლობალური ჯანდაცვის ფონდები 55%-ით შემცირდება.
შემცირებების განსახორციელებლად კონგრესის თანხმობაა საჭირო. თუმცა, მოსალოდნელია, რომ ეს შემცირებები კონგრესში წინააღმდეგობას წააწყდება, მათ შორის რესპუბლიკელი კანონმდებლების მხრიდანაც.
დიდი შემცირებები
ეს დისკუსიები ემთხვევა ტრამპის ადმინისტრაციისა და მილიარდერ ილონ მასკის "მთავრობის ეფექტიანობის დეპარტამენტის" მცდელობებს, სწრაფად და მნიშვნელოვნად შეამცირონ ფედერალური მთავრობა. ეს მცდელობები მოიცავს მილიარდობით დოლარის ხარჯების შემცირებას და ათასობით თანამშრომლის სამსახურიდან გათავისუფლებას.
პრეზიდენტობის პირველი ვადის განმავლობაში ტრამპს შეთავაზებული ჰქონდა აშშ-ის დიპლომატიისა და დახმარების ბიუჯეტების დაახლოებით მესამედით შემცირება. თუმცა, კონგრესმა, რომელიც ფედერალური მთავრობის ბიუჯეტს განსაზღვრავს, ტრამპის ეს წინადადება არ დაამტკიცა.
დოკუმენტის თანახმად, სხვა შეთავაზებებს შორისაა: საგარეო დახმარების მეოთხედზე მეტის გაუქმება; გლობალური ჯანდაცვის ფონდების სრულად გაუქმება აივ-თან ბრძოლისთვის განკუთვნილი მცირე თანხის გარდა; გაეროს დაფინანსების შეწყვეტა; ავღანელი მოკავშირეების დამხმარე მთავარი ოფისის დახურვა და ლტოლვილთა და მიგრანტთა რიგი პროგრამების შეწყვეტა.
