თურქეთმა სატრანსპორტო სექტორში მდგრადობის განვითარების მიზნით ახალი ნაბიჯი გადადგა და „ნულოვანი ნარჩენების ფონდთან“ თანამშრომლობის პროტოკოლს მოაწერა ხელი.
ოთხშაბათს, ანკარაში, სამინისტროში გამართულ ხელმოწერის ცერემონიაზე სიტყვით გამოსვლისას, აბდულქადირ ურალოღლუმ განმარტა, რომ ეს შეთანხმება სატრანსპორტო პროექტებში ნარჩენების მართვის სტანდარტებს უმაღლეს დონეზე აიყვანს.
„ჩვენ გავზრდით მეორადი მასალების გამოყენებას მშენებლობისა და მოვლის პროცესებში, დავნერგავთ ნულოვანი ნარჩენების სტანდარტებს ჩვენს პორტებში, აეროპორტებსა და სადგურებში. ასევე, მგზავრებს, თანამშრომლებსა და ყველა დაინტერესებულ მხარეს შორის მდგრადი ტრანსპორტის შესახებ ცნობიერებას ავამაღლებთ“, - განაცხადა ურალოღლუმ.
მინისტრმა აღნიშნა, რომ სატრანსპორტო სექტორი მსოფლიოში სათბურის აირების ემისიების დაახლოებით 21%-ზეა პასუხისმგებელი და ამ მხრივ მესამე ადგილზეა, ხოლო თურქეთში 17,6%-იანი წილით იგი ემისიების გამომწვევი მეორე უმსხვილესი სექტორია.
„ეს ციფრები ნათლად აჩვენებს, რომ ტრანსპორტის სექტორმა კრიტიკული როლი უნდა ითამაშოს კლიმატის ცვლილებასთან ბრძოლაში“, - დასძინა მან.
ურალოღლუმ ხაზი გაუსვა უკვე მიმდინარე ინიციატივებს, მაგალითად მოიყვანა ევროკავშირის ფინანსური მხარდაჭერით შემუშავებული „თურქეთის ნულოვანი ემისიის საგზაო რუკა ტრანსპორტში“ და მწვანე კამპანია „ყოველი ბილეთი - ერთი ნერგი“.
მისივე თქმით, ტრანსპორტის სამინისტრო პირველი უწყებაა თურქეთში, რომელმაც საკუთარი კორპორატიული ნახშირბადის კვალი დათვალა. სამინისტროს მონაცემებით, მხოლოდ შეუფერხებელი მოძრაობის გაუმჯობესების ღონისძიებების წყალობით, ატმოსფეროდან 6,55 მილიონი ტონა ნახშირბადი იქნა მოცილებული, რაც დაახლოებით ერთი მილიონი ზრდასრული ხის მიერ ერთი წლის განმავლობაში შთანთქმული ნახშირბადის ოდენობის ტოლფასია.
სხვა ეკოლოგიურ მიღწევებს შორის ურალოღლუმ დაასახელა წელიწადში დაახლოებით ორი მილიონი ტონა ასფალტის რეციკლირება, ეკოლოგიური ხიდებისა და ველობილიკების მოწყობა, ასევე რკინიგზით ტვირთების გადაზიდვის წილის გაზრდა 5%-დან 22%-მდე. მან ასევე აღნიშნა, რომ სტამბოლის „მარმარაის“ სარკინიგზო პროექტმა 2013 წელს ექსპლუატაციაში შესვლის დღიდან 62 მილიონი ტონა ნახშირბადის ემისია აიცილა თავიდან.
ავიაციის სფეროზე საუბრისას მინისტრმა აღნიშნა, რომ „აეროპორტების ნახშირბადის აკრედიტაციის პროგრამის“ ფარგლებში, თურქეთი 52 სერტიფიცირებული აეროპორტით მსოფლიოში მეორე ადგილზეა აშშ-ის შემდეგ. გარდა ამისა, აეროპორტებში „Follow Me“ მომსახურებისთვის სამინისტრო თურქული წარმოების 145 ელექტრომობილს, Togg-ს იყენებს.
„ნულოვანი ნარჩენების ფონდის“ პრეზიდენტმა სამედ აღირბაშმა ცერემონიაზე განაცხადა, რომ თურქეთი წელს ორ დიდ საერთაშორისო ღონისძიებას უმასპინძლებს.
პირველი - „ნულოვანი ნარჩენების ფორუმი“ - 5-7 ივნისს გაიმართება. ფორუმს მხარს უჭერენ მსოფლიო ბანკი, გაერო და წამყვანი უნივერსიტეტები, როგორიცაა ჰარვარდი და კემბრიჯი. მოსალოდნელია, რომ ღონისძიება 150-ზე მეტი ქვეყნის წარმომადგენელს, 100-ზე მეტ მინისტრსა და 5000-ზე მეტ მონაწილეს უმასპინძლებს. ასევე, წლის ბოლოს თურქეთი COP31-ის მასპინძლობისთვის ემზადება.
აღირბაშმა შეაქო თურქეთის ინვესტიციები ტრანსპორტსა და ინფრასტრუქტურაში და აღნიშნა, რომ მსოფლიოს სხვადასხვა კუთხიდან ჩამოსული სტუმრები აღფრთოვანებულნი არიან ქვეყნის განვითარებით. მან დასძინა, რომ ახლად გაფორმებული პროტოკოლი კიდევ უფრო გააძლიერებს მინისტრ ურალოღლუს ხელმძღვანელობით დაწყებულ ნულოვანი ნარჩენებისკენ მიმართულ მუშაობას.
