თურქეთი და ირანი: ისრაელის ექსპანსიონიზმი ახლო აღმოსავლეთის სტაბილურობისთვის ყველაზე დიდი საფრთხეა
ანკარამ და თეირანმა ისრაელის ექსპანსიონისტური პოლიტიკის მიმართ ერთობლივი წინააღმდეგობა დაადასტურეს და ვაჭრობის გაზრდის, სასაზღვრო გამშვები პუნქტების მოდერნიზების, მიგრაციის საკითხებში კოორდინაციისა და რეგიონულ კრიზებთან ბრძოლის გეგმები დასახეს.
თურქეთის საგარეო საქმეთა მინისტრმა ჰაქან ფიდანმა თეირანში გამართული მაღალი დონის შეხვედრების შემდეგ განაცხადა, რომ ანკარა და თეირანი მიზნად ისახავენ მნიშვნელოვნად გაზარდონ თანამშრომლობა ვაჭრობის, ენერგეტიკის, საზღვრის მართვისა და რეგიონული უსაფრთხოების სფეროებში.
კვირას თეირანში ირანელ კოლეგა აბას არაღჩისთან გამართულ ერთობლივ პრესკონფერენციაზე საუბრისას, ფიდანმა აღნიშნა, რომ ორივე მხარე შეთანხმდა იმაზე, რომ ეკონომიკური ურთიერთობები არსებულ პოტენციალს მნიშვნელოვნად ჩამორჩება.
ფიდანმა ყურადღება გაამახვილა ორ მეზობელს შორის არსებულ ღრმა კოორდინაციაზე და განაცხადა: „ვაჭრობა და ენერგეტიკა ჩვენი პრიორიტეტული საკითხებია და დღეს კიდევ ერთხელ დავინახეთ, რომ გასაკეთებელი ჯერ კიდევ ბევრია“.
მინისტრმა ასევე დასძინა, რომ ისინი იმუშავებენ ქვეყნებს შორის სასაზღვრო გამშვები პუნქტების რაოდენობის გაზრდაზე, გადაადგილების გამარტივებასა და ახალი ლოგისტიკური და სატრანსპორტო პროექტების განხორციელებაზე.
„ისრაელი — ყველაზე დიდი საფრთხე ახლო აღმოსავლეთის სტაბილურობისთვის“
რეგიონულ საკითხებზე საუბრისას, ფიდანმა ისაუბრა ღაზაში არსებულ ვითარებაზე, ლიბანსა და სირიაში დაძაბულობასა და ისრაელის „ექსპანსიონისტურ პოლიტიკასთან“ დაკავშირებულ შეშფოთებაზე, რა დროსაც აღნიშნა, რომ ორივე ქვეყანა ისრაელს „ახლო აღმოსავლეთის სტაბილურობისთვის ყველაზე დიდ საფრთხედ“ მიიჩნევს.
„საერთაშორისო საზოგადოებამ თავისი ვალდებულებები უნდა შეასრულოს“, — განაცხადა მინისტრმა და რეგიონული უსაფრთხოების შესანარჩუნებლად უფრო ძლიერი გლობალური ზეწოლისკენ მოუწოდა.
ფიდანმა კიდევ ერთხელ დაადასტურა თურქეთის მხარდაჭერა ირანის მიმართ მიმდინარე ბირთვული მოლაპარაკებების პროცესში და მოითხოვა იმ სანქციების გაუქმება, რომლებიც მან „უსამართლოდ“ შეაფასა, ამასთანავე ხაზი გაუსვა, რომ თეირანმა გადაუჭრელი საკითხები „საერთაშორისო სამართლის საფუძველზე“ უნდა მოაგვაროს.
გარდა ამისა, მან კვლავ აღნიშნა ანკარის მხარდაჭერა იმ დიპლომატიური ძალისხმევისადმი, რომელიც რუსეთ-უკრაინის ომის დასრულებას ისახავს მიზნად.
ბრძოლა არალეგალურ მიგრაციასთან
ფიდანმა განაცხადა, რომ თურქეთი და ირანი განიხილავენ კოორდინირებულ ნაბიჯებს ავღანეთიდან მომდინარე არალეგალურ მიგრაციასთან საბრძოლველად და მოუწოდა „კონკრეტული თანამშრომლობისკენ“ ამ პრობლემის გადასაჭრელად, რომელიც ფართო რეგიონზე ახდენს გავლენას.
ორმხრივი ურთიერთობების გაღრმავების მცდელობის ფარგლებში, ანკარა მიესალმა ირანის გეგმას თურქეთის აღმოსავლეთით მდებარე პროვინცია ვანში ახალი საკონსულოს გახსნის შესახებ. ფიდანმა აღნიშნა, რომ გახსნის ცერემონიას არაღჩისთან ერთად დაესწრება.
მინისტრები ასევე შეთანხმდნენ, რომ თურქეთ-ირანის უმაღლესი დონის თანამშრომლობის საბჭოს მეცხრე სხდომა პრეზიდენტების დონეზე „უმოკლეს ვადებში“ გაიმართება