პოლიციის განცხადებით, შვეიცარიის მდიდრულ სამთო-სათხილამურო კურორტ კრანს-მონტანაში (Crans-Montana), საახალწლო ღამეს ხალხმრავალ ბარში გაჩენილი ხანძრის შედეგად მრავალი ადამიანი დაიღუპა და დაშავდა.

სამხრეთ-დასავლეთ შვეიცარიის ვალეს (Wallis) კანტონის პოლიციამ გამოაცხადა, რომ ტურისტებისთვის პოპულარულ ბარში საახალწლო ზეიმის დროს „ჯერჯერობით დაუდგენელი მიზეზით ხანძარი“ გაჩნდა.

განცხადებაში აღნიშნულია, რომ „მრავალი ადამიანი გარდაიცვალა, ბევრი კი დაშავდა“. ხაზგასმითაა ნათქვამი, რომ შემთხვევა „სერიოზულია“ და „მიმდინარეობს ფართომასშტაბიანი საგანგებო ოპერაცია“.

„შემთხვევის ადგილზე დაუყოვნებლივ გაიგზავნა პოლიციის, სახანძრო და სამაშველო ჯგუფების დიდი რაოდენობა მრავალი მსხვერპლის დასახმარებლად“. ოპერაცია ამ დრომდე გრძელდება.

შვეიცარიული გაზეთი Blick, შემთხვევის ადგილზე მყოფ ექიმზე დაყრდნობით იტყობინება, რომ დაღუპულთა რიცხვი შესაძლოა „ათეულობით“ იყოს. რეგიონული გამოცემა Le Nouvelliste კი წერს, რომ მათი წყაროები „მძიმე შედეგებზე“ საუბრობენ - დაახლოებით 40 დაღუპულსა და 100 დაშავებულზე.

შვეიცარიულ მედიაში გავრცელებულ კადრებში ჩანს ცეცხლში გახვეული შენობა და ადამიანები, რომლებიც სიბნელეში ყვირილით გარბიან.

ზოგიერთი მედიასაშუალება ვარაუდობს, რომ ხანძარი შესაძლოა კონცერტის დროს გამოყენებული პიროტექნიკის გამო გაჩნდა, თუმცა პოლიციამ განაცხადა, რომ ზუსტი მიზეზი ჯერ უცნობია.

პოლიციის წარმომადგენელმა, გაეტან ლატიონმა AFP-სთან მანამდე განაცხადა, რომ თავდაპირველად მოხდა „გაურკვეველი მიზეზით გამოწვეული აფეთქება“. მისი თქმით, აფეთქება ადგილობრივი დროით 01:30 საათზე მოხდა ბარში „Le Constellation“, სადაც საახალწლო ზეიმის აღსანიშნავად 100-ზე მეტი ადამიანი იყო შეკრებილი.

აფეთქებიდან რამდენიმე საათში AFP-ის კორესპონდენტმა კრანს-მონტანასკენ მიმავალ გზაზე სასწრაფო დახმარების უამრავი მანქანა შენიშნა. პოლიციამ გამოაცხადა, რომ ტერიტორია „საზოგადოებისთვის სრულად ჩაიკეტა“ და კრანს-მონტანას თავზე „არასაფრენი ზონა“ გამოცხადდა.