აშშ-მა ქუვეითში დაღუპული კიდევ ორი ჯარისკაცის ვინაობა დაასახელა

ოთხშაბათს პენტაგონმა ირანის წინააღმდეგ ომის დროს დაღუპული კიდევ ორი ამერიკელი ჯარისკაცის ვინაობა გაასაჯაროვა.

არმიის რეზერვის ორი სამხედრო კვირას, ქუვეითის შუაიბას პორტში მდებარე აშშ-ის სამხედრო ობიექტზე განხორციელებული დრონით თავდასხმისას დაიღუპა. იმავე თავდასხმას კიდევ ოთხი რეზერვისტის სიცოცხლე ემსხვერპლა.

აშშ-ის თავდაცვის დეპარტამენტის განცხადებით, შაბათს ირანული უპილოტო საფრენი აპარატის მიერ შუაიბას პორტზე მიტანილი იერიშის შედეგად დაღუპული ექვსი ამერიკელი სამხედროდან ორია: 45 წლის ჯეფრი რ. ო’ბრაიენი (ინდიანოლა, აიოვა) და 54 წლის რობერტ მ. მარზანი (საკრამენტო, კალიფორნია).

პენტაგონში მიიჩნევენ, რომ მარზანი თავდასხმის ადგილზევე გარდაიცვალა, თუმცა მისი ვინაობის საბოლოო დადასტურება სასამართლო-სამედიცინო ექსპერტიზის დასრულების შემდეგ მოხდება.

მანამდე პენტაგონმა სხვა ოთხი ჯარისკაცის ვინაობა გაამჟღავნა: 35 წლის კოდი ა. ქორქი (უინტერ ჰევენი, ფლორიდა); 42 წლის ნოა ლ. ტიტჯენსი (ბელვიუ, ნებრასკა); 39 წლის ნიკოლ მ. ამორი (უაით ბეარ ლეიკი, მინესოტა) და 20 წლის დეკლან ჯ. კოადი (უესტ დე მოინი, აიოვა).

შუაიბას პორტი ქუვეითის კომერციული პორტია, რომელიც ამავდროულად აშშ-ის არმიისთვის ტაქტიკური მანქანებისა და მასალების ტრანსპორტირების მნიშვნელოვან ლოგისტიკურ ცენტრს წარმოადგენს.

თავდასხმის შედეგად ასევე 18 ჯარისკაცი დაშავდა.

აღნიშნული დრონით თავდასხმა მოხდა მას შემდეგ, რაც შაბათს აშშ-მა და ისრაელმა ირანზე ერთობლივი იერიში მიიტანეს, რომლის დროსაც რამდენიმე მაღალი რანგის ირანელი ოფიციალური პირი, მათ შორის უზენაესი ლიდერი ალი ხამენეი დაიღუპა.

მას შემდეგ ირანმა საპასუხო დარტყმები განახორციელა სპარსეთის ყურის ქვეყნებსა და რეგიონში არსებულ აშშ-ის სამხედრო ობიექტებზე.