ჰამასმა შაბათს გაკეთებულ განცხადებაში აღნიშნა, რომ მხარს უჭერს ირანის უფლებას დაიცვას თავი ისრაელისა და აშშ-ის წინააღმდეგ, თუმცა მიუთითა, რომ მეზობელ ქვეყნებზე თავდასხმებისგან თავი უნდა შეიკავონ.
ჯგუფმა ასევე მოუწოდა საერთაშორისო საზოგადოებას ნაბიჯების გადადგმისკენ 28 თებერვალს დაწყებული და ახლო აღმოსავლეთში გავრცელებული ომის დასასრულებლად.
ჰამასმა თავის განცხადებაში აღნიშნა: „ვადასტურებთ ირანის ისლამური რესპუბლიკის უფლებას, საერთაშორისო სამართლისა და ნორმების ფარგლებში ამ აგრესიას ყველა არსებული საშუალებით უპასუხოს, ამავდროულად, მოვუწოდებთ ჩვენს ძმებს ირანში, თავი შეიკავონ მეზობელი ქვეყნების სამიზნეში ამოღებისგან“.
ჰამასმა, რომელმაც ღაზაში ისრაელთან ორწლიანი დამანგრეველი ომი გამოიარა, განაცხადა, რომ საერთაშორისო საზოგადოებამ ასევე უნდა იმუშაოს მიმდინარე ომის დაუყოვნებლივ შესაჩერებლად.
ჰამასმა მანამდე, ომის პირველ დღეს, ირანის იმდროინდელი სულიერი ლიდერის, ალი ხამენეის მკვლელობა „საძაგელ დანაშაულად“ შეაფასა და ღიად აღიარა ხამენეის მიერ პალესტინის მოძრაობისთვის მრავალი წლის განმავლობაში გაწეული მხარდაჭერა.
ჯგუფმა აღნიშნა, რომ ხამენეი პალესტინელ ხალხს, მათ საქმესა და წინააღმდეგობას ყოველგვარ პოლიტიკურ, დიპლომატიურ და სამხედრო მხარდაჭერას უწევდა.
ჰამასის ერთ-ერთმა მაღალჩინოსანმა AFP-სთან გაკეთებულ განცხადებაში თქვა, რომ მოძრაობა ამ საკითხთან დაკავშირებით ირანელ ოფიციალურ პირებთან კონტაქტზეა.
„ისრაელის მხირდან ოკუპაცია მიზნად ისახავს განხეთქილების ჩამოგდებას ირანსა და მის არაბ და ისლამურ მეზობლებს შორის“, — განაცხადა წყარომ, რომელმაც მედიასთან საუბრის უფლებამოსილების არქონის გამო ვინაობის გამჟღავნება არ ისურვა.
აშშ-ისა და ისრაელის სამხედრო უპირატესობის მიუხედავად, ირანმა საპასუხო დარტყმები განახორციელა სარაკეტო და უპილოტო საფრენი აპარატების შეტევებით, რომელთა სამიზნეც სულ მცირე 10 ქვეყანა გახდა.
