THY-მ ტრამპ-ერდოღანის შეხვედრების შემდეგ 225 Boeing-ის თვითმფრინავის შეძენის გადაწყვეტილება გამოაცხა

თურქეთის ავიახაზების (THY) განცხადებაში ნათქვამია, რომ შეკვეთილი იქნება 75 ერთეული Boeing B787 თვითმფრინავი, ასევე დასრულდა მოლაპარაკებები 150 ერთეული 737-8/10 MAX თვითმფრინავის შესყიდვაზე, რაც ძრავების მწარმოებელ CFM International-თან მოლაპარაკებების საგანს წარმოადგენს.

სტამბოლის საფონდო ბირჟის, თურქეთის ერთადერთი საფონდო პლატფორმისთვის გაკეთებულ განცხადებაში, სადაც ივაჭრება აქციები, სავალო ინსტრუმენტები, წარმოებული პროდუქტები და სხვა ფინანსური აქტივები, ნათქვამია, რომ თურქეთის ავიახაზებმა გადაწყვიტეს Boeing-ისგან შეიძინონ 75 ერთეული B787-9 და B787-10 მოდელის თვითმფრინავი, საიდანაც 50 შეკვეთა არის დადასტურებული, ხოლო 25 – ოფციონური.

კომპანიამ განაცხადა, რომ ამ თვითმფრინავების მიწოდება დაგეგმილია 2029-დან 2034 წლამდე.

თვითმფრინავების ძრავებთან, სათადარიგო ძრავებთან და ძრავების ტექნიკური მომსახურების საკითხებთან დაკავშირებით მოლაპარაკებები გრძელდება Rolls-Royce-თან და GE Aerospace-თან.

თურქეთის ავიახაზებმა ასევე დაადასტურეს, რომ დაასრულეს მოლაპარაკებები Boeing-თან სულ 150 ერთეული 737-8/10 MAX მოდელის თვითმფრინავის შესაძენად, საიდანაც 100 შეკვეთა არის დადასტურებული, ხოლო 50 – ოფციონური.

აღინიშნა, რომ 737-8/10 MAX თვითმფრინავებზე შეკვეთები განთავსდება ძრავების მწარმოებელ CFM International-თან წარმატებული მოლაპარაკებების დასრულების შემდეგ.

კომპანიის განცხადებაში ნათქვამია: „ამ შეკვეთებთან ერთად, მიზანია, რომ 2035 წლისთვის ჩვენი მთელი ფლოტი შედგებოდეს ახალი თაობის თვითმფრინავებისგან, რითაც განმტკიცდება ჩვენი ოპერაციული ეფექტურობა და საშუალო წლიური ზრდის ტემპი იქნება 6%“.