ირანის საგარეო საქმეთა მინისტრმა აბას არაღჩიმ შაბათს განაცხადა, რომ უარყოფს აშშ-ის მტკიცებებს ირანში საპროტესტო აქციების დროს 32 000 მშვიდობიანი მოქალაქის დაღუპვის შესახებ. არაღჩიმ აღნიშნა, რომ თეირანმა უკვე გაასაჯაროვა ოფიციალური მონაცემები და მოუწოდა, წარადგინონ მტკიცებულებები, რომლებიც უფრო მაღალ მაჩვენებლებს დაადასტურებს.

აშშ-ის პრეზიდენტმა დონალდ ტრამპმა პარასკევს განაცხადა: „იცით, ირანელი ხალხი ძალიან განსხვავდება ირანის ლიდერებისგან და ეს ძალიან, ძალიან, ძალიან სამწუხაროა“, და დასძინა, რომ იქ „შედარებით მოკლე დროში“ 32 000 ადამიანი დაიღუპა.

არაღჩიმ X-ის საშუალებით განაცხადა, რომ თეირანმა შეასრულა სრული გამჭვირვალობის დაპირება და გამოაქვეყნა „ბოლო ტერორისტული ოპერაციების“ 3 117 მსხვერპლის ოფიციალური სია, მათ შორის უსაფრთხოების ძალების დაახლოებით 200 თანამშრომლის. მან ასევე დასძინა: „თუ ვინმე ეჭვქვეშ აყენებს ჩვენი მონაცემების სიზუსტეს, გთხოვთ, გააზიაროთ თქვენს ხელთ არსებული მტკიცებულებები“.

პარასკევს დილით ტრამპმა, დეტალების დაზუსტების გარეშე, განაცხადა, რომ ირანის შეთანხმებაზე დასაყოლიებლად შეზღუდულ სამხედრო დარტყმას „განიხილავს“.

დაპატიმრებების ბოლო ტალღა რამდენიმე კვირის შემდეგ მოჰყვა ირანში ეკონომიკური სირთულეების გამო მშვიდობიანად დაწყებულ საპროტესტო აქციებს, რომლებიც მოგვიანებით ძალადობაში გადაიზარდა და, ოფიციალური მონაცემებით, 3 000-ზე მეტი ადამიანის დაღუპვით დასრულდა. ირანის ხელისუფლებამ აშშ და ისრაელი დაადანაშაულა იმ მოვლენების მხარდაჭერაში, რომლებსაც ისინი „ამბოხს“ და „ტერორიზმს“ უწოდებენ.

ირანმა და აშშ-მა ბირთვული მოლაპარაკებები ამ თვის დასაწყისში ომანის დედაქალაქ მასკატში განაახლეს, რასაც სამშაბათს ჟენევაში, ომანის შუამავლობით, კიდევ ერთი რაუნდი მოჰყვა. განახლებული დიპლომატიური პროცესი მიმდინარეობს რეგიონული დაძაბულობის ფონზე, რომელსაც სპარსეთის ყურეში აშშ-ის სამხედრო ძალების მნიშვნელოვანი კონცენტრაცია და ირანის სამხედრო სწავლებები ამწვავებს.

ხუთშაბათს ვაშინგტონში, „მშვიდობის საბჭოს“ გახსნით შეხვედრაზე სიტყვით გამოსვლისას ტრამპმა გააფრთხილა, რომ მოლაპარაკებების წარუმატებლობის შემთხვევაში, აშშ ირანის წინააღმდეგ სამხედრო მოქმედებებს „10-დან 15 დღემდე“ ვადაში მიმართავს.