ზორან მამდანიმ ქალაქის მერიაში (City Hall) გამართულ ცერემონიაზე ოფიციალურად დადო ფიცი, როგორც ნიუ-იორკის 112-ე მერმა. ის გახდა პირველი მუსლიმი და სამხრეთაზიელი, რომელიც აშშ-ის უდიდეს ქალაქს უხელმძღვანელებს.

მამდანიმ ფიცი წმინდა ყურანზე დადო. ფიცის დადების ცერემონიას უკვე მეორედ უძღვებოდა აშშ-ის სენატორი ბერნი სანდერსი, რომელიც მის პროგრესულ კამპანიას უჭერდა მხარს.

მერიაში შეკრებილ მხარდამჭერებს, ქალაქის მაღალჩინოსნებსა და ოჯახის წევრებს მამდანიმ შემდეგი სიტყვებით მიმართა: „გპირდებით: თუ თქვენ ნიუ-იორკელი ხართ, მე თქვენი მერი ვარ. ჩვენი იდეები ერთმანეთს ემთხვეოდეს თუ არა, მე დაგიცავთ, თქვენთან ერთად ვიზეიმებ, თქვენთან ერთად ვიგლოვებ და არასოდეს დაგტოვებ, ერთი წამითაც კი“.

„მე დემოკრატ-სოციალისტად ამირჩიეს და დემოკრატ-სოციალისტური პრინციპებით ვმართავ. რადიკალის იარლიყის მიწებების შიშით ჩემს პრინციპებზე უარს არ ვიტყვი“, - განაცხადა მამდანიმ და კიდევ ერთხელ დაადასტურა წინასაარჩევნო დაპირებები ბავშვზე საყოველთაო ზრუნვისა და ბინის ქირის გაყინვის შესახებ.

მამდანის თქმით, მისი ადმინისტრაცია არცერთ ნიუ-იორკელს არ დატოვებს ელემენტარული საჭიროებების გარეშე და არ დაუშვებს, რომ ქალაქი მხოლოდ მდიდარ ელიტას ან დაყოფილ სტრუქტურას ემსახურებოდეს.

მან ასევე ხაზი გაუსვა ქალაქის მრავალფეროვნებას და აღნიშნა, რომ ნიუ-იორკის ისტორიას დაწერენ ადამიანები, რომლებიც საუბრობენ სხვადასხვა ენაზე - პუშტუდან და მანდარინიდან დაწყებული, იდიშითა და კრეოლურით დამთავრებული, და რომლებიც ლოცულობენ მეჩეთებში, სინაგოგებში, ეკლესიებში, გურდვარებსა თუ ტაძრებში. „ბეი-რიჯში (Bay Ridge) მცხოვრები პალესტინელი ნიუ-იორკელები აღარ იქნებიან იმ პოლიტიკის მსხვერპლნი, რომელიც საყოველთაოობაზე საუბრობს, თუმცა მათ გამონაკლისად აქცევს“, - დასძინა მან.

„ყველაზე დიდი პოლიტიკური სიურპრიზი“

სანდერსმა მამდანის გამარჯვებას თანამედროვე ამერიკის ისტორიაში ყველაზე დიდი პოლიტიკური სიურპრიზი უწოდა და აღნიშნა, რომ დაპირებები საცხოვრებლის ხელმისაწვდომობაზე, საზოგადოებრივი ტრანსპორტის გაფართოებასა და ბავშვთა უფასო მოვლაზე არა რადიკალური, არამედ სწორი და ჰუმანური ნაბიჯებია.

კონგრესმენმა ალექსანდრია ოკასიო-კორტესმა განაცხადა, რომ მამდანის მოსვლა ქალაქისთვის ახალი ეპოქის დასაწყისია და მას „ყველას მერი“ უწოდა.

ცერემონია შუაღამისას გამართული სიმბოლური ფიცის დადების შემდეგ ჩატარდა. 34 წლის მამდანი ბოლო თაობების განმავლობაში ნიუ-იორკის ყველაზე ახალგაზრდა და აფრიკაში დაბადებული პირველი მერი გახდა. ის უგანდაში, კამპალაში, ინდოელი მიგრანტების ოჯახში დაიბადა და აშშ-ის მოქალაქეობა 2018 წელს მიიღო.