ისრაელის თავდაცვის მინისტრმა კიდევ ერთხელ განაცხადა, რომ ისრაელი ღაზას „არასოდეს დატოვებს“. მან კვლავ დადო პირობა, რომ რეგიონის გარშემო უსაფრთხოების ფართო ზონა შეიქმნება და ჩრდილოეთ ნაწილში დასახლებებთან დაკავშირებული საქმიანობა იქნება დაშვებული.

გამოცემა Haaretz-ის ინფორმაციით, საგანმანათლებლო კონფერენციაზე გამოსვლისას კაცმა აღნიშნა, რომ ისრაელი ღაზაში მუდმივ ყოფნას შეინარჩუნებს და უსაფრთხოების ფართო ბუფერულ ზონას შექმნის.

კაცმა ანალოგიური განცხადებები ღაზას ჩრდილოეთით დასახლებების მშენებლობის შესახებ კვირის დასაწყისშიც გააკეთა. ისრაელის მედიის ცნობით, ამ განცხადებებმა აშშ-ის პრეზიდენტ დონალდ ტრამპის ადმინისტრაციის უკმაყოფილება გამოიწვია, რის გამოც ტრამპმა კაცს ნათქვამი ნაწილობრივ უკან წააღებინა.

კაცმა აღნიშნა, რომ საჭირო დროს შესაძლებელი იქნება ღაზას ჩრდილოეთით „ნაჰალის“ (Nahal) ფორპოსტების „ორგანიზებულად“ განთავსება.

„ნაჰალის“ ფორპოსტები ახალგაზრდებისთვის განკუთვნილი დასახლების ფორმაა, რომელსაც ისრაელის არმია ზედამხედველობს და ის სამხედრო სამსახურს დასახლების საქმიანობასთან აერთიანებს.

კაცმა უარყო ინფორმაცია იმის შესახებ, რომ მან წინა განცხადებები უკან წაიღო. მან ხაზგასმით აღნიშნა, რომ ისრაელი ღაზაში „დე ფაქტო სუვერენიტეტს“ განახორციელებს და ეს ოკუპირებულ დასავლეთ სანაპიროზე ისრაელის პოლიტიკას შეადარა.

კონტროლი ოკუპირებულ დასავლეთ სანაპიროზე

პალესტინელი მაღალჩინოსნების განცხადებით, ხოცვა-ჟლეტის დაწყებიდან მოყოლებული, ისრაელმა გაააქტიურა ქმედებები ოკუპირებულ დასავლეთ სანაპიროზე კონტროლის განსამტკიცებლად; ეს ქმედებები მოიცავს სახლების დანგრევას, იძულებით გადაადგილებასა და დასახლებების გაფართოებას.

ოკუპირებული დასავლეთ სანაპიროს ანექსია ფაქტობრივად გამორიცხავს გაეროს რეზოლუციებით გათვალისწინებული „ორი სახელმწიფოს პრინციპით“ კონფლიქტის მოგვარების შესაძლებლობას.

აღმოსავლეთ იერუსალიმის ჩათვლით, ოკუპირებულ დასავლეთ სანაპიროზე დაახლოებით 750 000 ისრაელელი მოსახლე (დამსახლებელი) ცხოვრობს.

ისრაელის მედია აფრთხილებს, რომ კაცის განცხადებებმა შესაძლოა გაართულოს პრემიერ-მინისტრ ბენიამინ ნეთანიაჰუს ვიზიტი ფლორიდაში, სადაც 29 დეკემბერს მისი ტრამპთან შეხვედრაა დაგეგმილი.