Artemis II-ის ასტრონავტები დედამიწისკენ მომავალ გზაზე მთვარესთან ახლოს გავლის მომენტებს აზიარებენ

ასტრონავტები დედამიწაზე ბრუნდებიან და კოლეგებს ისტორიული მოგზაურობის დეტალებს, კერძოდ კი მთვარესთან ახლოს გავლის ეპიზოდებს უზიარებენ.

გამორჩეულ კადრებს შორის არის „დედამიწის ჩასვლის“ (Earthset) შთამბეჭდავი ფოტო, სადაც ჩანს, როგორ ეშვება ჩვენი პლანეტა მთვარის უსწორმასწორო ჰორიზონტის მიღმა. ეს არის მიზანმიმართული მინიშნება 1968 წელს, Apollo 8-ის მისიის დროს გადაღებულ საკულტო ფოტოზე - „დედამიწის ამოსვლა“.

NASA-სა და თეთრი სახლის მიერ გამოქვეყნებული ეს თანამედროვე კადრი ასახავს მთვარის ზედაპირის მკვეთრ სიმრუდესა და დედამიწას ღრმა კოსმოსის ფონზე.

ეკიპაჟი ჰიუსტონის მისიების მართვის ცენტრის მეცნიერებს აწვდის ინფორმაციას იმ დაკვირვებების შესახებ, რომლებიც მათ მთვარის შვიდსაათიანი შესწავლისას ჩაატარეს.

მთვარის მეცნიერების მიმართულების ხელმძღვანელმა, კელსი იანგმა, ასტრონავტებს მიმართა: „მთვარის შემსწავლელი მთელი ჩვენი გუნდი და ფართო სამეცნიერო საზოგადოება აღფრთოვანებული და მადლიერია; იცოდეთ, რომ იმას, რაც გუშინ გააკეთეთ, მეცნიერებისთვის მართლაც დიდი მნიშვნელობა აქვს“.

მოგვიანებით იანგმა დაამატა, რომ „განწყობა ძალიან ოპტიმისტურია“ და დასძინა: „ჩვენ მიზანს მივაღწიეთ“.

ისტორიული მოგზაურობა

ოთხკაციანი ეკიპაჟი - რიდ უაისმენი, კრისტინა კოხი, ვიქტორ გლოვერი და კანადელი ასტრონავტი ჯერემი ჰანსენი - მთვარის გარშემო იმ ფართომასშტაბიანი პროგრამის ფარგლებში გაფრინდნენ, რომლის მიზანიც 2028 წლისთვის მთვარეზე ადამიანის დაშვებაა.

ფრენის დასრულების შემდეგ - რა დროსაც მათ დედამიწიდან დაშორების რეკორდი მოხსნეს - ასტრონავტებმა უკან დაბრუნება დაიწყეს. ვარაუდობენ, რომ კაფსულა პარასკევს კალიფორნიის სანაპიროსთან, წყნარ ოკეანეში დაეშვება.

ეკიპაჟის წევრები საერთაშორისო კოსმოსური სადგურის კოლეგებსაც დაუკავშირდნენ. ასტრონავტებმა დეტალურად აღწერეს მთვარის ზედაპირი და განაცხადეს, რომ მზის დაბნელებასაც შეესწრნენ (როდესაც მთვარე მზის წინ მოექცა). მათ ასევე შენიშნეს სინათლის გაელვებები, რომლებიც, სავარაუდოდ, მეტეორიტების დაჯახებით იყო გამოწვეული.

იანგის თქმით, როდესაც ეკიპაჟი თავის დაკვირვებებს აზიარებდა, NASA-ს სამეცნიერო შეფასების ოთახში სიხარულის ყიჟინა ისმოდა.

Artemis II-ის მისიამ 1970 წელს Apollo 13-ის მიერ დამყარებული რეკორდი მოხსნა; ხომალდი დედამიწას 4 000 მილით (6 000 კილომეტრით) მეტად დაშორდა და საერთო ჯამში 252 756 მილის (406 771 კილომეტრი) მანძილს მიაღწია.

ვიქტორ გლოვერი გახდა პირველი ფერადკანიანი, ჯერემი ჰანსენი - პირველი არაამერიკელი, ხოლო კრისტინა კოხი - პირველი ქალი, რომელმაც მთვარის გარშემო იფრინა.

ხომალდ Orion-ის კაფსულა თავისუფალი დაბრუნების ტრაექტორიით მოემართება, ხოლო სამაშველო გემი დაშვების ზონისკენ მიემართება.