პრეზიდენტმა პატრის ტალონმა კვირას განაცხადა, რომ ქვეყანაში გადატრიალების მცდელობის შემდეგ ბენინში ვითარება „სრული კონტროლის ქვეშაა“ და მოქალაქეებს შეუძლიათ დაუბრუნდნენ თავიანთ ყოველდღიურ საქმიანობას.
დასავლეთ აფრიკის ქვეყნის პრეზიდენტმა სახელმწიფო მაუწყებლის, Benin TV-ის ეთერით მოსახლეობისადმი მიმართვისას თქვა, რომ „ჯარისკაცების მცირე ჯგუფმა... წამოიწყო აჯანყება რესპუბლიკურ ინსტიტუტებზე თავდასხმის, დემოკრატიული წესრიგის ხელყოფისა და ქვეყანაში დესტაბილიზაციის გამოწვევის მიზნით“.
ტალონმა განაცხადა, რომ როგორც პრეზიდენტმა და შეიარაღებული ძალების უმაღლესმა მთავარსარდალმა, მიიღო საჭირო ზომები ქვეყანაში უსაფრთხოების უზრუნველსაყოფად.
ბენინის პრეზიდენტმა ასევე მადლობა გადაუხადა იმ სამხედროებს, რომლებიც „რესპუბლიკისა და ქვეყნის ერთგულნი“ დარჩნენ და აღნიშნა, რომ ეს მცდელობა „დაუსჯელი არ დარჩება“.
მანამდე, კვირას, ბენინელი ჯარისკაცების ჯგუფმა სახელმწიფო მაუწყებლისთვის მიცემულ განცხადებაში თქვა, რომ პრეზიდენტი ტალონი თანამდებობიდან გადააყენეს და ახალშექმნილი „სამხედრო აღდგენის კომიტეტის“ ხელმძღვანელად ვიცე-პოლკოვნიკი პასკალ ტიგრი დანიშნეს.
შინაგან საქმეთა მინისტრმა, ალასან სეიდუმ კი ეროვნული ტელევიზიით განაცხადა, რომ „ჯარისკაცების მცირე ჯგუფის“ მიერ გადატრიალების მცდელობა აღკვეთილია.
ადგილობრივი საინფორმაციო საიტის, „24 Heures Au Benin“-ის ცნობით, თავდაცვისა და უსაფრთხოების ძალები ტიგრის ეძებდნენ.
აღნიშნული გადატრიალების მცდელობა მოხდა გვინეა-ბისაუში ნოემბრის ბოლოს განხორციელებული სამხედრო გადატრიალების შემდეგ, რომლის შედეგადაც დროებით პრეზიდენტად გენერალი ჰორტა ინტა-ა დაინიშნა.
