საუდის არაბეთის ხელმძღვანელობით მოქმედი არაბული კოალიციის სპიკერმა, ბრიგადის გენერალმა თურქი ალ-მალიქიმ წერილობით განცხადებაში აღნიშნა, რომ საუდის არაბეთის საჰაერო თავდაცვის ძალებმა შაბათს, 19 სექტემბრის დილას, ჰუსიტების მიერ რიადის მიმართულებით ნასროლი ბალისტიკური რაკეტა გაანეიტრალეს.
მალიქიმ განაცხადა, რომ ჰუსიტები აგრძელებენ რიადში სამოქალაქო პირებისა და სამოქალაქო ობიექტების სამიზნეში ამოღებას. მისი თქმით, ქალაქში, სადაც 8 მილიონზე მეტი მოქალაქე და რეზიდენტი ცხოვრობს, მშვიდობიანი მოსახლეობისა და სამოქალაქო ობიექტების მიზანმიმართული და სისტემატური დაბომბვა „ტერორისტული და მტრული ქმედებაა“.
ალ-მალიქიმ აღნიშნა, რომ ჰუსიტები მანამდეც ცდილობდნენ ბიშის, ტაიფის, ფარასანისა და იენბუს ქალაქებში სამოქალაქო პირებისა და ობიექტების სამიზნეში ამოღებას, თუმცა ეს მცდელობები საჰაერო თავდაცვის სისტემებმა აღკვეთეს.
ალ-მალიქიმ ხაზგასმით აღნიშნა, რომ კოალიციის სარდლობას აქვს კანონიერი უფლება, მიიღოს შესაბამისი ზომები ჰუსიტების ქმედებების შესაკავებლად.
