ვენესუელის დროებითმა პრეზიდენტმა, დელსი როდრიგესმა, კვირას გაკეთებულ განცხადებაში აშშ-ის მთავრობას ვენესუელასთან ერთობლივი მუშაობისკენ მოუწოდა. ეს განცხადება მოჰყვა ამერიკული ძალების მიერ ჩატარებულ რეიდს, რომლის დროსაც პრეზიდენტი ნიკოლას მადურო და მისი მეუღლე „დააკავეს“ და სხვადასხვა ბრალდებით სასამართლოში წარსადგენად აშშ-ში გადაიყვანეს.

სოციალურ ქსელ Instagram-ზე გამოქვეყნებულ განცხადებაში როდრიგესმა აღნიშნა: „ჩვენ მოვუწოდებთ აშშ-ის მთავრობას, საერთაშორისო სამართლის ფარგლებში ითანამშრომლოს ჩვენთან ერთობლივი განვითარებისკენ მიმართული თანამშრომლობის დღის წესრიგზე“.

„სუვერენული თანასწორობისა და ჩაურევლობის პრინციპზე დაყრდნობით, ჩვენ პრიორიტეტს ვანიჭებთ დაბალანსებულ და პატივისცემაზე დაფუძნებულ საერთაშორისო ურთიერთობებს აშშ-სა და ვენესუელას შორის, ისევე როგორც ვენესუელასა და რეგიონის სხვა ქვეყნებს შორის“, — განაცხადა როდრიგესმა და აშშ-ის პრეზიდენტ დონალდ ტრამპს მიმართა: „ბატონო პრეზიდენტო, ჩვენი ხალხები და ჩვენი რეგიონი იმსახურებს არა ომს, არამედ მშვიდობასა და დიალოგს. ეს არის გზავნილი, რომელსაც პრეზიდენტი ნიკოლას მადურო ყოველთვის აჟღერებდა და ახლა ეს მთელი ვენესუელის გზავნილია“.

კვირას დილით, როდრიგესის შესახებ დასმულ კითხვაზე ტრამპმა აღნიშნა, რომ როდრიგესი „თანამშრომლობს“, თუმცა გააფრთხილა, რომ თუ ის ამას არ გააკეთებს, „სავარაუდოდ მადუროზე უარესი მდგომარეობა დაუდგება“.

კითხვაზე, თუ რას ითხოვს როდრიგესისგან, ტრამპმა უპასუხა: „ჩვენ გვჭირდება სრული წვდომა. გვჭირდება წვდომა მათ ნავთობზე და სხვა რესურსებზე, რაც მათი ქვეყნის აღდგენის საშუალებას მოგვცემს“.

შაბათს გვიან ღამით ნიუ-იორკში ჩაყვანილი მადურო და მისი მეუღლე, სილია ფლორესი, ამჟამად ბრუკლინის მეტროპოლიტენის დაკავების ცენტრში იმყოფებიან. მადუროს წყვილს აშშ-ში ფედერალური ბრალდება აქვს წარდგენილი ნარკოტრაფიკსა და იმ დაჯგუფებებთან თანამშრომლობისთვის, რომლებიც „ტერორისტულ ორგანიზაციებად“ არის კლასიფიცირებული.

მადურო ბრალდებებს უარყოფს, ხოლო ვენესუელის დედაქალაქ კარაკასის ოფიციალური პირები წყვილის დაუყოვნებლივ გათავისუფლებას ითხოვენ.