ჩინეთი მოუწოდებს აშშ-სა და იაპონიას, გაიტანონ რეგიონიდან Typhon-ის სარაკეტო სისტემა, რომელიც ცოტა ხნის წინ განლაგდა იაპონიის დასავლეთში მდებარე აშშ-ის სამხედრო ბაზასთან ერთობლივი წვრთნებისთვის.
ჩინეთის საგარეო საქმეთა სამინისტროს პრესსპიკერმა, ლინ ძიანმა პეკინში გამართულ პრესკონფერენციაზე განაცხადა: "აშშ-მა და იაპონიამ გულწრფელად უნდა სცენ პატივი სხვა ქვეყნების უსაფრთხოების საკითხებზე ზრუნვას და გადადგან კონკრეტული ნაბიჯები რეგიონული მშვიდობისა და სტაბილურობისთვის, და არა პირიქით".
ჩინეთის რეაქცია მოჰყვა აშშ-ის მიერ საშუალო რადიუსის სარაკეტო სისტემის განლაგებას იამაგუჩის პრეფექტურაში მდებარე ივაკუნის საზღვაო ქვეითთა ბაზაზე, რომელსაც შეუძლია Tomahawk-ის ტიპის ფრთოსანი რაკეტების გასროლა.
პეკინი მოუწოდებს ვაშინგტონსა და ტოკიოს, "ყური დაუგდონ რეგიონის ქვეყნების მოწოდებას, გამოასწორონ დაშვებული შეცდომა და რაც შეიძლება მალე გაიტანონ სისტემა". ლინმა ასევე აღნიშნა, რომ "იაპონიის სამხედრო და უსაფრთხოების ნაბიჯებს, მილიტარისტული აგრესიის წარსულის გამო, ყოველთვის ყურადღებით აკვირდებიან აზიის მეზობელი ქვეყნები და საერთაშორისო საზოგადოება".
ეს სისტემა პირველად იქნება გამოყენებული აშშ-სა და იაპონიას შორის ყოველწლიურ ორმხრივ სამხედრო წვრთნებში Resolute Dragon, რომელიც 11 სექტემბერს დაიწყო და ორ კვირას გაგრძელდება.
იაპონია, რომელიც მეორე მსოფლიო ომის შემდეგ აშშ-ის დიდი ხნის მოკავშირეა აზია-წყნარი ოკეანის რეგიონში, ბოლო წლებში მნიშვნელოვნად გაზარდა თავდაცვის შესაძლებლობები, რაც ჩინეთის მზარდი სამხედრო არსებობისა და რეგიონული გავლენის საპასუხოდ მოხდა.
ქვეყანა მასპინძლობს სამხედრო ბაზებსა და იარაღს, ისევე როგორც ათასობით ამერიკელ ჯარისკაცს.
