მოსკოვი და კიევი ერთმანეთს ცეცხლის შეწყვეტის რეჟიმის დარღვევაში ადანაშაულებენ; გავრცელდა ინფორმაცია, რომ შაბათს, ზავის დაწყებიდან სულ რამდენიმე საათში, ათასზე მეტი თავდასხმა განხორციელდა უპილოტო საფრენი აპარატებისა და არტილერიის გამოყენებით.

რუსეთის თავდაცვის სამინისტრო ამტკიცებს, რომ კვირა ღამით უკრაინის მხრიდან ცეცხლის შეწყვეტის რეჟიმის სულ 1971 დარღვევა დაფიქსირდა.

სამინისტრომ ასევე განაცხადა, რომ უკრაინულმა შენაერთებმა დნეპროპეტროვსკის, სუმისა და დონეცკის ოლქებში რუსულ პოზიციებზე არაერთი ღამის თავდასხმა განახორციელეს.

მეორე მხრივ, უკრაინის გენერალურმა შტაბმა განაცხადა, რომ ზავის დაწყებიდან კვირა საღამოს 22:00 საათამდე 7696 დარღვევა დააფიქსირა.

აღინიშნა, რომ ამ მონაცემებში შედის 1355 საარტილერიო თავდასხმა, 115 საიერიშო ოპერაცია და 6226 დრონი-კამიკაძეს თავდასხმა.

ომის გამო, რომელიც თებერვალში მეხუთე წელში გადავიდა, ამ ბრალდებების დამოუკიდებლად დადასტურება რთულია.

რუსეთის პრეზიდენტმა ვლადიმერ პუტინმა ხუთშაბათს ცეცხლის შეწყვეტის შესახებ გამოაცხადა; მან სამხედრო სარდლობას მისი აღსრულებისთვის მომზადების ინსტრუქცია მისცა და განაცხადა, რომ უკრაინის მხრიდან პროვოკაციის შემთხვევაში მოსკოვი საპასუხო დარტყმას განახორციელებდა.

ზავის ძალაში შესვლამდე რამდენიმე საათით ადრე უკრაინის პრეზიდენტმა ვოლოდიმირ ზელენსკიმ განაცხადა, რომ კიევიც შეუერთდებოდა ამ ინიციატივას და „შესაბამისად“ იმოქმედებდა.

მიუხედავად აღნიშნული ვალდებულებებისა, ორივე მხარემ ზავის დაწყებიდან სულ რამდენიმე საათში ერთმანეთი დარღვევებში დაადანაშაულა.