ჯანმოს მრჩეველმა, დოქტორმა ვასი მორტიმ ოთხშაბათს განაცხადა, რომ ვირუსის ამ კონკრეტული ტიპის, სახელწოდებით „Bundibugyo“, წინააღმდეგ ვაქცინის ორი კანდიდატი შემუშავების პროცესშია, თუმცა ჯერჯერობით არცერთ მათგანს კლინიკური გამოცდის ეტაპი არ გაუვლია.
შემთხვევების რაოდენობა იზრდება: გამოცხადდა საერთაშორისო საგანგებო მდგომარეობა
ჯანმოს გენერალურმა დირექტორმა, დოქტორმა ტედროს ადჰანომ გებრეიესუსმა განაცხადა, რომ ეპიდაფეთქების ფარგლებში ამ დროისთვის დაფიქსირებულია 600 საეჭვო შემთხვევა და 139 საეჭვო გარდაცვალება. ვირუსის გამოვლენის პროცესის გათვალისწინებით, მოსალოდნელია ამ ციფრების ზრდა.
ჟენევაში ჟურნალისტებთან საუბრისას გებრეიესუსმა აღნიშნა, რომ კდრ-ში, სადაც პირველი შემთხვევა დაფიქსირდა, დადასტურებულია 51, ხოლო მეზობელ უგანდაში - 2 შემთხვევა.
კვირას ჯანმომ ეპიდაფეთქების გამო „საერთაშორისო მნიშვნელობის საზოგადოებრივი ჯანმრთელობის საგანგებო მდგომარეობა“ გამოაცხადა, თუმცა ხაზგასმით აღნიშნა, რომ მდგომარეობა ჯერჯერობით არ არის პანდემიის (გლობალური ეპიდემიის) დონეზე. გებრეიესუსის თქმით, საგანგებო კომიტეტის რისკის შეფასებით, ეპიდაფეთქება ეროვნულ და რეგიონულ დონეზე მაღალია, ხოლო გლობალურ დონეზე - დაბალი.
კდრ-ში დადასტურებული შემთხვევები დაფიქსირდა ეპიდაფეთქების ეპიცენტრში - აღმოსავლეთით მდებარე იტურის რეგიონში, ასევე ჩრდილოეთ კივუს პროვინციაში. უგანდის დედაქალაქ კამპალაში დაფიქსირებული 2 პირი კდრ-დან იყო ჩასული, ერთ-ერთი მათგანი გარდაიცვალა.
სამედიცინო ცენტრები არასაკმარისია
იტურის რეგიონის ოქროს მომპოვებელი ქალაქებიდან მიღებული ცნობები მოწმობს, რომ ჯანდაცვის სისტემა დიდ დატვირთვას განიცდის.
ორგანიზაციის „ექიმები საზღვრებს გარეშე“ (MSF) გადაუდებელი პროგრამების მენეჯერმა, ტრიშ ნიუპორტმა აღნიშნა, რომ რეგიონში არსებული დაწესებულებები საეჭვო პაციენტებითაა გადატვირთული და ადგილები აღარ არის.
გაერთიანებული სამეფოს მთავრობამ გამოაცხადა, რომ ეპიდაფეთქების კონტროლის მიზნით, წინა ხაზზე მყოფი სამედიცინო პერსონალის, ინფექციების კონტროლისა და დაავადებაზე ზედამხედველობისთვის 20 მილიონ ფუნტამდე დაფინანსებას გამოყოფს.
ეპიდაფეთქების პირველი ცნობილი შემთხვევა იყო მედდა, რომელიც 24 აპრილს იტურის პროვინციის დედაქალაქ ბუნიაში გარდაიცვალა. ხელისუფლება აგრძელებს კვლევას იმის დასადგენად, თუ რა დროის განმავლობაში ვრცელდებოდა ვირუსი ფარულად.
Bundibugyo-ს შტამი და ვაქცინის დეფიციტი
ებოლას ვირუსის ოთხი ცნობილი ტიპი არსებობს, რომლებიც ადამიანებში დაავადებას იწვევს. ქვეყანაში მანამდე ხშირად გავრცელებული „Zaire“-ს ტიპისგან განსხვავებით, „Bundibugyo“-ს შტამი ათ წელზე მეტია არ გამოჩენილა, რაც ეპიდაფეთქების შეჩერებას ართულებს.
ეს ტიპი მანამდე მხოლოდ 2007 წელს უგანდაში და 2012 წელს კდრ-ში დაფიქსირდა; მაშინ ინფიცირებულთა დაახლოებით მესამედი გარდაიცვალა. მიუხედავად იმისა, რომ სიკვდილიანობის მაჩვენებელი სხვა შტამებთან შედარებით დაბალია, მისი იშვიათობის გამო ამ ტიპის წინააღმდეგ დამტკიცებული ვაქცინა ან სპეციალური მედიკამენტი არ არსებობს.
ჯანმოს ოფიციალური პირების ვარაუდით, არსებული ექსპერიმენტული ვაქცინებიდან პირველის მომზადებას 6-დან 9 თვემდე დასჭირდება.
მეორე ვაქცინის კანდიდატი, რომელიც კოვიდ-19-ის ვაქცინის მსგავსი ტექნოლოგიით იქმნება, შესაძლოა 2 ან 3 თვეში იყოს მზად კლინიკური კვლევებისთვის (ცხოველებზე ჩატარებული ექსპერიმენტების შედეგების მიხედვით), თუმცა ამ პროცესში გაურკვევლობის დონე მაღალია.
