ისლანდიის საზოგადოებრივმა მაუწყებელმა (RUV) ოთხშაბათს განაცხადა, რომ არ მიიღებს მონაწილეობას კონკურსში, მას შემდეგ, რაც ევროპის მაუწყებელთა კავშირმა (EBU) გასულ კვირას 2026 წლის ევროვიზიის სიმღერის კონკურსში ისრაელის მონაწილეობას მხარი დაუჭირა.
მაისში, ვენაში დაგეგმილ მომდევნო ევროვიზიაზე ისრაელის დაშვების გადაწყვეტილებამ მანამდე ესპანეთის, ნიდერლანდების, ირლანდიისა და სლოვენიის კონკურსიდან გასვლა გამოიწვია, რაც მათ ღაზის ომში ისრაელის ქმედებებითა და პროტესტით ახსნეს.
RUV-ის გენერალურმა დირექტორმა სტეფან ეირიქსონმა განაცხადა: „ჩვენს ქვეყანაში მიმდინარე საზოგადოებრივი განხილვებიდან და EBU-ს გასულ კვირას მიღებულ გადაწყვეტილებაზე გამოხატული რეაქციიდან გამომდინარე, ნათელია, რომ RUV-ის მონაწილეობას არც სიხარული მოჰყვება და არც სიმშვიდე“.
ისლანდია იმ ქვეყნებს შორის იყო, რომლებიც გასულ კვირას ისრაელის მონაწილეობის საკითხზე კენჭისყრას ითხოვდნენ.
თუმცა, ევროპის მაუწყებელთა კავშირმა გადაწყვიტა, არ ჩაეტარებინა კენჭისყრა ისრაელის მონაწილეობასთან დაკავშირებით და განმარტა, რომ მიიღო ახალი წესები, რომლებიც მიზნად ისახავს კონკურსზე მთავრობების გავლენის თავიდან აცილებას.
ისლანდიას ევროვიზიის სიმღერის კონკურსი არასდროს მოუგია, თუმცა 1999 და 2009 წლებში მეორე ადგილი დაიკავა. EBU-ს თანახმად, ევროვიზიის სიმღერის კონკურსი 1956 წლიდან ტარდება და მას დაახლოებით 160 მილიონი მაყურებელი ჰყავს.
