ნეთანიაჰუ ირანის ახალ უზენაეს ლიდერს დაემუქრა და ისრაელ-აშშ-ის ერთობლივი ომი დაიცვა

ომის დაწყების შემდეგ გამართულ პირველ პრესკონფერენციაზე, ნეთანიაჰუმ ირანის ახალი უზენაესი ლიდერის მიმართ ფარული მუქარა გააჟღერა და ირანის წინააღმდეგ მიმართული ისრაელ-აშშ-ის ერთობლივი ომი დაიცვა.

ხუთშაბათს გამოსვლისას ნეთანიაჰუმ აღნიშნა, რომ აშშ-ისრაელის თითქმის ორკვირიანი საჰაერო დაბომბვების შემდეგ ირანი „აღარ არის იგივე“ და განაცხადა, რომ თეირანის ელიტარულ „ისლამური რევოლუციის გუშაგთა კორპუსსა“ და „ბასიჯის“ გასამხედროებულ ძალებს სერიოზული დარტყმები მიადგათ.

ვიდეოკონფერენციის საშუალებით კითხვებზე პასუხისას, ნეთანიაჰუმ ასევე პირობა დადო, რომ გააგრძელებს ლიბანში „ჰეზბოლას“ წინააღმდეგ მოქმედებებს.

ირანის მიერ მხარდაჭერილმა დაჯგუფებამ ცეცხლი 2 მარტს გახსნა, რაც ომის დასაწყისში ირანის უზენაესი ლიდერის მკვლელობის საპასუხო რეაქცია იყო.

მჭიდრო კონტაქტები აშშ-ის პრეზიდენტთან

როდესაც ჰკითხეს, თუ რა ნაბიჯები შეიძლება გადადგას ისრაელმა ირანის ახალი უზენაესი ლიდერის, მოჯთაბა ხამენეისა და „ჰეზბოლას“ ლიდერის, ნაიმ ქასემის წინააღმდეგ, ნეთანიაჰუმ დეტალებზე საუბარი არ ისურვა, თუმცა შემდეგი გაფრთხილება გასცა: „ტერორისტული ორგანიზაციის არცერთ ლიდერს არ გავუფორმებდი სიცოცხლის დაზღვევის პოლისს“.

„არ ვაპირებ კონკრეტული მესიჯის გაჟღერებას იმის შესახებ, თუ რას ვგეგმავთ ან რას გავაკეთებთ“, - განაცხადა ნეთანიაჰუმ. მან აღნიშნა, რომ ირანი და „ჰეზბოლა“ აღარ წარმოადგენენ იმავე საფრთხის დონეს, რასაც ომამდე, და დასძინა, რომ კონფლიქტის დროს აშშ-ის პრეზიდენტ დონალდ ტრამპთან ხშირი კონტაქტი ჰქონდა.

ნეთანიაჰუმ ხაზგასმით აღნიშნა, რომ ის და ტრამპი ყოველდღიურად საუბრობდნენ და მათი დისკუსიები თავისუფალი და ღია ხასიათისა იყო.