თურქეთის პრეზიდენტის ადმინისტრაციის კომუნიკაციების დეპარტამენტის ხელმძღვანელმა, ბურჰანეთინ დურანმა განაცხადა: „დღეს თურქეთი, 30 აგვისტოს გამოვლენილი დამოუკიდებლობის სულისკვეთებით გაძლიერებული, როგორც საკუთარი გადაწყვეტილებების დამოუკიდებლად მიმღები, რეგიონსა და მსოფლიოში მზარდი გავლენის მქონე, ძლიერი და თავდაჯერებული სახელმწიფო, თავის გზას მტკიცედ განაგრძობს“.
სოციალურ ქსელში 30 აგვისტოს გამარჯვების დღესთან დაკავშირებით გამოქვეყნებულ მიმართვაში დურანმა აღნიშნა, რომ 30 აგვისტო ერთიანობით შეკრული თურქი ერის ურყევი ნებისყოფის ერთ-ერთი ყველაზე ძლიერი გამოვლინებაა, რომლისთვისაც დამოუკიდებლობა და მომავალი ყველა ღირებულებაზე მაღლა დგას.
დურანმა ხაზი გაუსვა, რომ ამ უნიკალური გამარჯვებით ერმა მთელ მსოფლიოს განუცხადა საკუთარი მომავლის განსაზღვრის ნება და ნებისმიერ პირობებში სამშობლოს მთლიანობისა და დამოუკიდებლობის დაცვის მტკიცე გადაწყვეტილება, და დასძინა:
„დღეს თურქეთი, 30 აგვისტოს გამოვლენილი დამოუკიდებლობის სულისკვეთებით გაძლიერებული, როგორც საკუთარი გადაწყვეტილებების დამოუკიდებლად მიმღები, რეგიონსა და მსოფლიოში მზარდი გავლენის მქონე, ძლიერი და თავდაჯერებული სახელმწიფო, თავის გზას მტკიცედ განაგრძობს. ჩვენი პატივცემული პრეზიდენტის, რეჯეფ თაიფ ერდოღანის ლიდერობით, „თურქეთის საუკუნის“ მიზნებისკენ გადადგმული ყოველი ნაბიჯით, მომავალ თაობებს გადავცემთ ეროვნულ-განმათავისუფლებელი ბრძოლის მიერ დატოვებულ თავისუფლების სულისკვეთებასა და პასუხისმგებლობის გრძნობას. ჩვენ დაუღალავად ვმუშაობთ, რათა ჩვენს ქვეყანას კიდევ უფრო ძლიერი, აყვავებული და პრესტიჟული მომავალი შევუქმნათ. ამ მნიშვნელოვან დღეს, უპირველეს ყოვლისა, გაზი მუსტაფა ქემალ ათათურქს, ეროვნულ-განმათავისუფლებელი ბრძოლის ყველა გმირს, სამშობლოს დამოუკიდებლობისთვის თავგანწირულ მოწამეებს მოკრძალებითა და მადლიერებით, ხოლო ჩვენს გმირ ვეტერანებს პატივისცემით ვიხსენებ. გილოცავთ 30 აგვისტოს გამარჯვების დღეს“.
პოსტში ასევე თანდართული იყო ვიდეორგოლი, რომელშიც პრეზიდენტი რეჯეფ თაიფ ერდოღანი იაჰია ქემალ ბეიათლის ლექსს – „1922 წლის 26 აგვისტოს“ კითხულობს და ასახულია „დიდი შეტევის“ ისტორიული კადრები.
