"Wall Street Journal"-ის ინფორმაციით, ამერიკის შეერთებული შტატები უკრაინას სადაზვერვო ინფორმაციას მიაწვდის, რათა რუსეთის ენერგეტიკულ ინფრასტრუქტურაზე შორი მანძილის სარაკეტო თავდასხმების განხორციელება შეძლოს.
გამოცემაში ნათქვამია, რომ ვაშინგტონი ნატოს მოკავშირეებსაც მოუწოდებს მსგავსი მხარდაჭერის გაწევისკენ.
გავრცელებული ინფორმაციით, გაფართოებული სადაზვერვო ინფორმაციის გაზიარების შესახებ თანხმობა ცოტა ხნით ადრე გაიცა, სანამ აშშ-ის პრეზიდენტი დონალდ ტრამპი სოციალურ მედიაში განაცხადებდა, რომ უკრაინას შეუძლია დაიბრუნოს რუსეთის მიერ ოკუპირებული ყველა ტერიტორია.
ტრამპმა უკრაინის პრეზიდენტ ვოლოდიმირ ზელენსკისთან გასულ კვირას გამართული შეხვედრის შემდეგ Truth Social-ზე შემდეგი განცხადება გააკეთა: "რუსეთში ომის შედეგად გამოწვეული ეკონომიკური სირთულეების დანახვის შემდეგ, ვფიქრობ, რომ ევროკავშირის მხარდაჭერით უკრაინას აქვს შესაძლებლობა დაიბრუნოს მთელი თავისი ტერიტორია პირვანდელი სახით."
ევროკავშირმა კიევს უფრო ძლიერი მხარდაჭერა აღუთქვა
ევროპელმა ლიდერებმა უკრაინასთან თავდაცვის სფეროში თანამშრომლობის გაფართოების პირობა დადეს და ხაზგასმით აღნიშნეს, რომ რუსეთის გაზრდილი თავდასხმები კონტინენტისთვის მზარდ საფრთხეს წარმოადგენს.
ევროპული საბჭოს პრეზიდენტმა ანტონიუ კოშტამ განაცხადა, რომ 23-24 ოქტომბერს დაგეგმილი სამიტი "გადაწყვეტილების მიღების დღე" იქნება.
დანიის პრემიერ-მინისტრმა მეტე ფრედერიკსენმა განაცხადა, რომ რუსეთი "გვემუქრება, გამოგვცდის და არ გაჩერდება".
ევროპის კომისიის პრეზიდენტმა ურსულა ფონ დერ ლაიენმა აღნიშნა, რომ "ინვესტიციების ზრდა" ევროპის თავდაცვაში უკვე დაწყებულია და მაგალითად 176 მილიარდი დოლარის ევროპის უსაფრთხოების სამოქმედო პროგრამა (SAFE) მოიყვანა.
ფონ დერ ლაიენმა ასევე გაიმეორა უპილოტო საფრენი აპარატების წინააღმდეგ "დრონების კედლის" შექმნის მოწოდება და განაცხადა: "ევროპის ყველა მოქალაქე და ევროპის ყველა სანტიმეტრი უსაფრთხო უნდა იყოს".
ფონ დერ ლაიენმა დასძინა: "ახლა ჩვენ გვჭირდება ზუსტი და მთელ ევროპაში მოქმედი გეგმა იმის შესახებ, თუ როგორ შევავსოთ შესაძლებლობების ხარვეზები და როგორ წავიდეთ წინ".
