NBC News-თან საუბარში ისრაელის დაზვერვის ყოფილმა წარმომადგენელმა განაცხადა, რომ ისრაელის თავდასხმების შედეგად მაღალი რანგის მეთაურების დაკარგვის მიუხედვად, ირანს შურისძიების განხორციელების შესაძლებლობა და სარაკეტო მარაგი აქვს.
წარმომადგენელმა, რომლის ვინაობაც NBC News-მა ანონიმურად დატოვა, თეირანის პოზიცია "სტრატეგიულ მოთმინებად" შეაფასა და ირანის მთავრობის კრიზისის ზღვარზე ყოფნის შესახებ გავრცელებულ ინფორმაციასთან დაკავშირებით გაფრთხილება გამოთქვა.
"თეირანს აქვს თავდასხმების გაგრძელების მტკიცე გადაწყვეტილება და უნარი", - განაცხადა მან.
წარმომადგენელმა აღნიშნა, რომ "ირანის მიერ ბოლო დღის განმავლობაში გაშვებული რაკეტები უფრო სწრაფია, რაც ამცირებს დროს რაკეტების მიზნობრივ წერტილებამდე მიღწევამდე და ისრაელს ნაკლებ მოსამზადებელ დროს უტოვებს".
მან ასევე განაცხადა, რომ ისრაელის სარაკეტო თავდაცვის სისტემებმა ბოლო 24 საათის განმავლობაში ირანული რაკეტების მხოლოდ 65%-ის შეჩერება შეძლეს, მაშინ როცა ერთი დღით ადრე ეს მაჩვენებელი თითქმის 90% იყო.
მისივე თქმით, ირანი უფრო სწრაფ და განვითარებულ რაკეტებს ანთავსებს, რაც ისრაელის გაფრთხილების დროს დაახლოებით 10 წუთიდან 6 წუთამდე ამცირებს და რომ ეს რაკეტები გაუმჯობესებული მართვის სისტემებითაა აღჭურვილი, რაც უფრო ზუსტად მიზანში ამოღების საშუალებას იძლევა.
"რაც მთავარია, ირანელებს თავდასხმის ბოლო ეტაპზე აქვთ საკმაოდ ზუსტი სანავიგაციო სისტემა, რაც მათ საშუალებას აძლევს, ზუსტად დაარტყან თავიანთ მიზნებს. დღეს ბეერ-შევას საავადმყოფოში მომხდარი ინციდენტის მსგავსად", - განაცხადა წარმომადგენელმა.
ახალი რაკეტები და ვაშინგტონის მოსალოდნელი ნაბიჯები
ისრაელის არმიამ განაცხადა, რომ ირანმა ბოლო თავდასხმების დროს მრავალთავიანი რაკეტა გამოიყენა, რაც საჰაერო თავდაცვისთვის ახალ გამოწვევას წარმოადგენს.
არმიის რადიომ, ორ წყაროზე დაყრდნობით, განაცხადა, რომ გუშ დანის მიმართულებით ნასროლი რაკეტა რამდენიმე პატარა რაკეტისგან შედგებოდა.
იმავდროულად, გაზეთმა Maariv-მა განაცხადა, რომ მას შემდეგ, რაც ირანმა Shahab-3-ის რაკეტაზე უფრო დიდი ქობინი გაუშვა, ისრაელის არმიამ გამოძიება დაიწყო.
გაზეთის ცნობით, ირანის მიერ გამოყენებულ რაკეტას, ხორემშაჰრს, ტონაზე მეტი ასაფეთქებელი ნივთიერების გადატანა შეუძლია.
სამხედრო დაძაბულობის ფონზე ყურადღება ამერიკის შეერთებული შტატებისკენ არის მიპყრობილი. პრეზიდენტმა დონალდ ტრამპმა განაცხადა, რომ ისრაელისთვის სამხედრო დახმარების გაწევასთან დაკავშირებით საბოლოო გადაწყვეტილება არ მიუღია.
CBS News-მა, წყაროზე დაყრდნობით, განაცხადა, რომ ტრამპს სჯერა ვარიანტები შეზღუდულია და დავალების შესრულება ირანის ფორდოს ობიექტის განადგურებას მოითხოვს.
წყაროს თქმით, ერთ-ერთი შესაძლებლობა, რომელსაც ტრამპი განიხილავს, არის ირანისთვის ობიექტის საკუთარი ძალებით გამორთვის უფლება.
ცნობილია, რომ ტრამპმა საბოლოო გადაწყვეტილება გადადო იმ იმედით, რომ თეირანი ბირთვულ პროგრამაზე უარს იტყვის.
ხუთშაბათს, თეთრმა სახლმა განაცხადა, რომ ირანს ბირთვული იარაღის შექმნას "სულ რამდენიმე კვირა აშორებს".
ეს მტკიცება ეწინააღმდეგება UAEA-ს და აშშ-ის სადაზვერვო სამსახურების ანგარიშებს, სადაც აღნიშნულია, რომ თეირანი ბირთვულ იარაღს არ აწარმოებს.
