თურქეთმა ეგეოსის კუნძულების დემილიტარიზებული სტატუსის შესუსტებისკენ მიმართული მცდელობები გააკრიტიკა და მათ „არასერიოზული, სამწუხარო და უდროო“ უწოდა.

ხუთშაბათს გავრცელებულ განცხადებაში საგარეო საქმეთა სამინისტრომ აღნიშნა, რომ 1923 წელს ხელმოწერილი ლოზანის ხელშეკრულებისა და 1947 წლის პარიზის სამშვიდობო ხელშეკრულების ფარგლებში, აღმოსავლეთ ეგეოსის კუნძულებისა და დოდეკანესის (თორმეტი კუნძულის) სამართლებრივი სტატუსი „სადისკუსიო თემა“ არ არის.

სამინისტროს პრესსპიკერმა, ონჯუ ქეჩელიმ განაცხადა: „ამ პირობებში, სულაც არ არის გასაკვირი, რომ გარკვეული წრეები, რომლებიც ცდილობენ ჩვენს რეგიონში მიმდინარე ბოლოდროინდელი მოვლენები შესაძლებლობად აქციონ და ყოველგვარი საბაბით მოწამლონ ჩვენი ორმხრივი ურთიერთობები ნატოს მოკავშირე საბერძნეთთან, კვლავ ცდილობენ პროცესების „ფაქტის წინაშე დაყენებას“.

„იმ წრეების მიერ საერთაშორისო სამართლის საწინააღმდეგოდ გადადგმული ნებისმიერი ნაბიჯი, რომლებიც თურქეთს რევიზიონიზმში ადანაშაულებენ, იურიდიული ძალის არმქონეა. კიდევ უფრო ნიშანდობლივი კი ისაა, რომ ეს აზროვნება, რომელიც წარსულში კუნძულ კვიპროსის თანამესაკუთრე კვიპროსელი თურქების მასობრივ განადგურებას ლამობდა, დღეს აცხადებს, რომ მათაც დაიცავს“, - აღნიშნა ქეჩელიმ.

ქეჩელიმ დასძინა, რომ კვიპროსელ თურქებსა და ჩრდილოეთ კვიპროსის თურქულ რესპუბლიკას, თურქეთის მხარდაჭერით, შეუძლიათ საკუთარი უსაფრთხოების უზრუნველყოფა და ამ საკითხში დამოუკიდებლად მოქმედება.

რეგიონში მიმდინარე მოვლენების ფონზე, ქეჩელიმ ხაზი გაუსვა „მშვიდობისა და სტაბილურობისადმი გულწრფელი ერთგულების“ მნიშვნელობას და განაცხადა, რომ ანკარა არ დაუშვებს ცალმხრივ ქმედებებს მათგან, ვინც შიდა პოლიტიკური მოტივებით მოქმედებს და ჩვევად აქვს ქცეული თურქეთის წინააღმდეგ დაუსაბუთებელი ბრალდებების გაჟღერება და დეზინფორმაციის გავრცელება.

მან მხარეებს კეთილგონიერებისკენ მოუწოდა.