აშშ-ის ყოფილ პრეზიდენტ ჯო ბაიდენს დაუდგინდა კიბო, რომელიც ძვლებშია გავრცელებული, თუმცა, როგორც აღინიშნა, ის განკურნებადია.

მისი პირადი ოფისის მიერ გაკეთებული განცხადების თანახმად, აშშ-ის ყოფილ პრეზიდენტ ჯო ბაიდენს პროსტატის „აგრესიული“ ფორმის კიბოს დიაგნოზი დაუსვეს, რომელიც ძვლებშია გავრცელებული.

კვირას გაკეთებულ განცხადებაში ნათქვამია: „გასულ კვირას, პრეზიდენტ ჯო ბაიდენს, რომელსაც აღენიშნებოდა შარდვასთან დაკავშირებული მზარდი სიმპტომები, პროსტატის კვანძის არსებობის ახალი ფაქტი დაუდგინდა.“

განცხადების თანახმად, დაავადება ძვლებშია მეტასტაზირებული და გლისონის ქულა 9-ს შეადგენს. ოფისის მიერ მოწოდებული ინფორმაციის თანახმად, „მიუხედავად იმისა, რომ ეს დაავადების უფრო აგრესიულ ფორმას წარმოადგენს, კიბო ჰორმონმგრძნობიარე ჩანს, რაც მისი ეფექტიანად მართვის საშუალებას იძლევა“.

ოფისმა ასევე განაცხადა, რომ 82 წლის ყოფილი პრეზიდენტი და მისი ოჯახი ამჟამად სამედიცინო გუნდთან ერთად მკურნალობის ვარიანტებს განიხილავენ.

ბაიდენი აშშ-ის პრეზიდენტის თანამდებობას 2021 წლიდან 2025 წლამდე იკავებდა.