აშშ-ის პრეზიდენტმა დონალდ ტრამპმა აღიარა ღაზაში პალესტინელების წინაშე არსებული შიმშილის სერიოზული პრობლემა და „საშინელებად“ შეაფასა შიმშილის კრიზისი, რომელიც გამოწვეულია ისრაელის ალყითა და ჰუმანიტარულ დახმარებაზე დაწესებული შეზღუდვებით.
„იქ რაც ხდება, საშინელებაა. დიახ, ეს საშინელი მდგომარეობაა. ხალხი ძალიან მშიერია“, - განაცხადა ტრამპმა თეთრ სახლში ჟურნალისტებთან საუბრისას და დასძინა, რომ „ეს მართლაც საშინელი მდგომარეობაა“.
თუმცა, აშშ-ის პრეზიდენტს არ უხსენებია ისრაელი, რომელმაც დახმარების სადისტრიბუციო პუნქტებთან 1000-ზე მეტი პალესტინელის სიკვდილი გამოიწვია.
ტრამპის ეს განცხადებები გაკეთდა იმ დროს, როდესაც აშშ-ის ახლო აღმოსავლეთის სპეციალური წარმომადგენელი სტივ ვიტკოფი და აშშ-ის ელჩი ისრაელში მაიკ ჰაკაბი ემზადებიან ღაზაში ვიზიტისთვის, რათა შეისწავლონ ისრაელის მიერ ოპერირებადი ღაზის ჰუმანიტარული დახმარების ფონდის (GHF) საკამათო სურსათის სადისტრიბუციო პუნქტები და კოორდინაცია გაუწიონ დახმარების ახალ სტრატეგიას.
„ოფიციალური პირები ღაზაში გაემგზავრებიან, რათა შეისწავლონ არსებული სადისტრიბუციო პუნქტები, შეიმუშაონ მეტი საკვების მიწოდების გეგმა და პირადად მოისმინონ ადგილობრივი ღაზელებისგან ამ სავალალო მდგომარეობის შესახებ“, - განაცხადა თეთრი სახლის პრესსპიკერმა კაროლინ ლივიტმა.
ლივიტს დეტალები არ დაუკონკრეტებია, თუ რომელ „ადგილობრივ ღაზელებთან“ გეგმავენ ოფიციალური პირები შეხვედრას.
ლივიტის თქმით, ეს ვიზიტი მას შემდეგ განხორციელდა, რაც თელ-ავივში სპეციალურ წარმომადგენელს სტივ ვიტკოფს, აშშ-ის ელჩს ისრაელში მაიკ ჰაკაბის და ისრაელის პრემიერ-მინისტრს ბენიამინ ნეთანიაჰუს შორის „ძალიან ნაყოფიერი“ შეხვედრა გაიმართა. მან ასევე აღნიშნა, რომ ორი ელჩი დაბრუნებისთანავე გამართავენ ბრიფინგს აშშ-ის პრეზიდენტთან და დახმარების მიწოდების გეგმა ამ შეხვედრის შემდეგ გაირკვევა.
ვიზიტი ხორციელდება ღაზაში შიმშილის კრიზისთან დაკავშირებით მზარდი საერთაშორისო შეშფოთების ფონზე, სადაც ისრაელი 2 მარტიდან თითქმის სრულ ბლოკადას ახორციელებს და აჩერებს ყველა დახმარების კოლონას, გაეროსა და ჰუმანიტარული ორგანიზაციების გადაუდებელი მოწოდებების მიუხედავად.
