პრეზიდენტმა რეჯეფ თაიფ ერდოღანმა განაცხადა: „15 ივლისი არ არის მხოლოდ ღამე, როდესაც ვერაგული სახელმწიფო გადატრიალების მცდელობა ჩაიშალა, არამედ ეს არის ისტორიაში ოქროს ასოებით ჩაწერილი დემოკრატიის დიდი გამარჯვება, როდესაც ჩვენმა ერმა საკუთარი სიცოცხლის ფასად დაიცვა თავისი ნება, დემოკრატია და დამოუკიდებლობა“.
15 ივლისის დემოკრატიისა და ეროვნული ერთიანობის დღესთან დაკავშირებით, პრეზიდენტმა ერდოღანმა დაწერა სტატია სათაურით „15 ივლისი: თურქეთის საუკუნის დამოუკიდებლობის დეკლარაცია“.
გაზეთებში გამოქვეყნებულ სტატიას, რომელიც იწყება სიტყვებით: „ზუსტად ათი წელი გავიდა იმ საბედისწერო ღამიდან, როდესაც მთელი ერი საკუთარი სიცოცხლის ფასად იბრძოდა დამოუკიდებლობისა და მომავლისთვის, რამაც შეცვალა ისტორიის მსვლელობა“, პრეზიდენტმა შემდეგი შეფასებები გააკეთა:
„15 ივლისი არ არის მხოლოდ ღამე, როდესაც ვერაგული სახელმწიფო გადატრიალების მცდელობა ჩაიშალა; ეს არის ისტორიაში ოქროს ასოებით ჩაწერილი დემოკრატიის დიდი გამარჯვება, როდესაც ჩვენმა ერმა საკუთარი სიცოცხლის ფასად დაიცვა თავისი ნება, დემოკრატია და დამოუკიდებლობა. იმ ღამეს ჩვენმა დიდებულმა ერმა იმპერიალისტებსა და მათ თანამონაწილეებს, რომლებიც ჩვენი სამშობლოს ოკუპაციას ცდილობდნენ, ისტორიის ერთ-ერთი უდიდესი გაკვეთილი ჩაუტარა, ისევე როგორც დამოუკიდებლობისათვის ომის დროს.
15 ივლისი არის ჩვენი კეთილშობილი ერის მიერ ისტორიაში ოქროს ასოებით ჩაწერილი დიდი ეპოსი, რომელიც დაიწერა იმ ადამიანების რწმენითა და სიმტკიცით, ვინც ქუჩებსა და მოედნებზე გამოვიდა; ზუსტად ისე, როგორც პოეტის სტრიქონებშია ნათქვამი: „ჩვენი წინაპრების დიდებულება მსოფლიოსთვისაა ცნობილი / ნუ გგონია, რომ ბუნება იცვლება, ეს სისხლი კვლავ ის სისხლია!“ - იმ ადამიანების რწმენით, ვინც ათასი წლის წინ მანასკერტთან გმირულად იბრძოდა, ვინც 500 წლის წინ სტამბოლის კედლებთან სულთან ფათიჰის ოცნების ასასრულებლად და ჩვენი მოციქულის ხარების ღირსად გახდომისთვის სული და სხეული გაწირა, და ვინც ასი წლის წინ სამშობლოს დასაცავად სიცოცხლე არაფრად ჩააგდო.“
„ჩვენმა ერმა თავად დაიცვა საკუთარი დამოუკიდებლობა და მომავალი“
თავის სტატიაში ერდოღანმა ხაზგასმით აღნიშნა, რომ ტერორისტული ორგანიზაციის ვერაგული ღალატის წინააღმდეგ, როდესაც ხალხს მოედნებსა და აეროპორტებში მოუწოდებდნენ ეროვნული ნების დასაცავად, ეს არ იყო უბრალო მოწოდება:
„ჩვენი მოწოდება ერისადმი იყო ჩვენი რწმენის გამოხატულება ჩვენი ძვირფასი ერის დემოკრატიული გონიერების, გამჭრიახობისა და სიმამაცის მიმართ. ჩვენი მიზანი იყო კვლავაც აღგვედგინა დევიზი „ან დამოუკიდებლობა, ან სიკვდილი!“, რომელიც ჩვენი წინაპრების მიერ დატოვებული ერთ-ერთი ყველაზე წმინდა მემკვიდრეობაა. ჩვენმა ერმა, რომელიც თითქოს ისტორიის სიღრმეებიდან წამოიმართა, ამ მოწოდებას მყისიერად უპასუხა საკუთარი სულისა და სიცოცხლის დაუზოგავად. მადლობა ღმერთს, ჩვენმა ერმა ეს ნდობა გაამართლა და კვლავ თავად დაიცვა საკუთარი დამოუკიდებლობა და მომავალი. იმ ღამეს ჩვენმა ერმა დაამსხვრია ჯაჭვები, რომლებითაც მისი ნების შებოჭვა სურდათ, მოიშორა მეურვეობისა და ღალატის ბორკილები და სათითაოდ დაანგრია თურქეთის წინაშე არსებული დაბრკოლებები. იმ ღამეს 253 სამშობლოს შვილი ეწამა, ხოლო 2 ათასზე მეტი დაშავდა. თითოეული ეს ციფრი სამშობლოს, დროშისა და ეროვნული ნების დაცვისთვის გაღებული თავგანწირვის, სიმამაცისა და გმირული სულის ცალკეული სიმბოლოა.“
„ყველა სფეროში ძირფესვიანად აღმოვფხვერით FETÖ“
პრეზიდენტმა ერდოღანმა აღნიშნა: „გასული ათი წლის განმავლობაში, ჩვენ გავაგრძელეთ ბრძოლა სისხლიანი ტერორისტული ორგანიზაციის, FETÖ-ს წინააღმდეგ, როგორც ქვეყნის შიგნით, ისე საერთაშორისო ასპარეზზე, კომპრომისების გარეშე და მტკიცე გადაწყვეტილებით.“ მან ასევე დაამატა:
„რადგან ჩვენს სახელმწიფოში შეპარული ამ სიმსივნური უჯრედის გაწმენდა და დამნაშავეების მართლმსაჯულების წინაშე წარდგენა ჩვენი უდიდესი ვალი იყო იმ მოწამეთა წინაშე, რომლებმაც სიცოცხლე სიხარულით გაწირეს. ბიუროკრატიიდან არმიამდე, სასამართლოდან ბიზნეს სამყარომდე - ყველა სფეროში ძირფესვიანად აღმოვფხვერით FETÖ. ამასთანავე, სასარგებლოა კიდევ ერთხელ გავიხსენოთ ეს მარტივი ჭეშმარიტება, რომელიც არასოდეს უნდა დავივიწყოთ: მომხდარი არ არის ბრძოლა, რომელიც 10 წლის წინ დაიწყო და დასრულდა. FETÖ-სა და მსგავსი ვერაგული სტრუქტურების ჩვენს სახელმწიფოზე და ერზე ხელახალი თავდასხმის თავიდან აცილების ერთადერთი გზაა 15 ივლისის სულისკვეთების მუდმივად ცოცხლად შენარჩუნება და ამ ცნობიერების მომავალი თაობებისთვის გადაცემა.“
„ამ ერის უდიდესი ძალა ერთობა და სოლიდარობაა“
ერდოღანმა სტატიაში აღნიშნა, რომ ვერაგული გადატრიალების მცდელობიდან გასული 10 წლის შემდეგაც, ტკივილი პირველი დღესავით მძაფრია:
„მიუხედავად ამისა, ჩვენ ვაგრძელებთ ომს FETÖ-სა და მსგავს ყველა ტერორისტულ კერასთან იგივე მონდომებითა და სიმტკიცით. 15 ივლისის მე-10 წლისთავზე გვაქვს გაცილებით ძლიერი, გაცილებით მტკიცე და ერთმანეთთან მჭიდროდ დაკავშირებული თურქეთი. ეჭვი არავის შეეპაროს, რომ სანამ ამ მიწაზე 15 ივლისის სული ცოცხლობს, მოღალატეების ვერაგული გეგმები და მათ უკან მდგარი გლობალური სცენარისტების ბინძური თამაშები ვერასოდეს მიაღწევს მიზანს.
ამ საბაბით, ღვთის წყალობას ვუსურვებ ყველა ჩვენს მოწამეს, ვინც საკუთარი მკერდით გადაეფარა იმ ბნელ ღამეს, გაანათა იგი და საკუთარი სიცოცხლის ფასად კვლავ სამშობლოდ გვიქცია ეს მიწები, რომლებიც ჩვენი წინაპრების დანატოვარია და სადაც საუკუნეების მანძილზე ვბატონობთ. ჩვენს ვეტერანებს ვუსურვებ ჯანმრთელობას, ბარაქიან და ხანგრძლივ სიცოცხლეს.
უფალმა ნუღარასოდეს გამოაცდევინოს ჩვენს ძვირფას ერს, რომლის წარსულიც დიდებული გამარჯვებებითაა ნაქსოვი, 15 ივლისის მსგავსი ღალატი. ამ ერის უდიდესი ძალა მისი ერთობაა, სოლიდარობაა და ათასწლიანი უძველესი ძმობაა, რომელიც სიხარულითა და სევდითაა ნაჭედი. ღმერთმა მარადიული გახადოს ჩვენი ერთობა, სოლიდარობა და ძმობა.“
