სომხეთის პრემიერ-მინისტრმა ნიკოლ ფაშინიანმა განაცხადა, რომ მის ქვეყანაში რუსული სამხედრო ბაზის ყოფნა სასიცოცხლო მნიშვნელობას არ ატარებს: „თუ რუსეთი სომხეთიდან სამხედრო ბაზის გაყვანას გადაწყვეტს, ჩვენ ამის წინააღმდეგი არ ვიქნებით“.

ნიკოლ ფაშინიანმა შეაფასა რუსეთის პრეზიდენტ ვლადიმერ პუტინთან 1 სექტემბერს, ყირგიზეთის დედაქალაქ ბიშკეკში გამართული შანხაის თანამშრომლობის ორგანიზაციის (შთო) სამიტის ფარგლებში გამართული შეხვედრა.

ფაშინიანმა აღნიშნა, რომ შეხვედრამ პოზიტიურად ჩაიარა და შეთანხმდნენ, რომ უახლოეს მომავალში იგი რუსეთის დედაქალაქ მოსკოვს ეწვევა.

მისივე თქმით, პუტინთან ასევე ისაუბრეს სომხეთის რკინიგზაზე, რომელსაც რუსეთი მართავს: „ჩამოყალიბდა ურთიერთგაგება, რომ ეს საკითხი უნდა გადავჭრათ. არსებული ვითარების დიდხანს გაგრძელება შეუძლებელია“.

სომხეთში რუსულ სამხედრო ბაზასთან დაკავშირებით კი ფაშინიანმა განაცხადა: „ეს საკითხი დღის წესრიგში არ დამდგარა. სომხეთში რუსული სამხედრო ბაზის ყოფნა სასიცოცხლო მნიშვნელობის არ არის. თუ რუსეთი გადაწყვეტს სომხეთიდან სამხედრო ბაზის გაყვანას, ჩვენ ამის წინააღმდეგი არ ვიქნებით. თუმცა, თუ დარჩენის სურვილს გამოთქვამენ, მზად ვართ ესეც განვიხილოთ“.

რუსეთის პრეზიდენტმა პუტინმა სომხეთის ქალაქ გიუმრიში მდებარე რუსულ სამხედრო ბაზასთან დაკავშირებით ადრე განაცხადა: „თუ სომხეთი გადაწყვეტს, რომ ეს ინფრასტრუქტურა არ სჭირდება, ხვალვე წავალთ“.