კატარი ღაზის სამშვიდობო მოლაპარაკებებში „მეორე ეტაპის“ დაწყებას ითხოვს

ღაზის მოლაპარაკებებში შუამავალმა კატარმა განაცხადა, რომ იმედოვნებს, ოქტომბრის ცეცხლის შეწყვეტის შეთანხმების შემდეგ, ისრაელსა და „ჰამასს“ შორის პალესტინის ტერიტორიაზე სამშვიდობო შეთანხმების მისაღწევად მოლაპარაკებები ახალ ეტაპზე გადავა.

სამშაბათს, კატარის საგარეო საქმეთა სამინისტროს პრესსპიკერმა, მაჯიდ ალ-ანსარიმ განაცხადა: „მიგვაჩნია, რომ მხარეებს ძალიან, ძალიან მალე უნდა ვუბიძგოთ მეორე ეტაპისკენ. ეს, რა თქმა უნდა, მოიცავს ისეთ საკითხებსაც, რომლებიც სიტუაციას ართულებს; მაგალითად, მებრძოლებს „ყვითელი ხაზის“ მიღმა არსებულ გვირაბებში და ინციდენტებს, რომლებიც რამდენიმე დღეში ერთხელ ხდება.“

ე.წ. „ყვითელი ხაზი“ აღნიშნავს წერტილს, სადამდეც ისრაელის ჯარისკაცებმა ღაზის შიგნით დაიხიეს. მაშინ, როცა ხაზის მიღმა არსებულ გვირაბებში „ჰამასის“ ათობით მებრძოლი ჯერ კიდევ ალყაშია, ისრაელი აცხადებს, რომ მათ სამიზნეში იღებს.

კატარმა, აშშ-სთან, თურქეთთან და ეგვიპტესთან ერთად, ღაზაში ცეცხლის შეწყვეტის ხანგრძლივი შეთანხმება უზრუნველყო; ეს შეთანხმება 10 ოქტომბერს შევიდა ძალაში და მნიშვნელოვანწილად შეაჩერა თელ-ავივის ორწლიანი გენოციდური ომი პალესტინის რეგიონის წინააღმდეგ.

ღაზის სამშვიდობო გეგმის პირველი ეტაპის მიხედვით, რომელიც თავდაპირველად აშშ-ის პრეზიდენტმა დონალდ ტრამპმა გამოაცხადა, პალესტინის წინააღმდეგობის მოძრაობა „ჰამასს“ და მის მოკავშირეებს ხელთ არსებული 48-ვე მძევალი უნდა დაებრუნებინათ; აღსანიშნავია, რომ მათგან 20 ჯერ კიდევ ცოცხალი იყო.

შეთანხმების ფარგლებში, 48 ისრაელელი მძევლის სანაცვლოდ, ისრაელს 2000 პალესტინელი პატიმარი უნდა გაეთავისუფლებინა, მათ შორის 250 პირი, რომელსაც სამუდამო პატიმრობა ჰქონდა მისჯილი და 1700 პირი, რომლებიც 2023 წლის ოქტომბრის შემდეგ დააკავეს.

მიუხედავად იმისა, რომ მათი დიდი ნაწილი დაბრუნდა, 10 000-ზე მეტი პალესტინელი კვლავ ისრაელის ციხეებში რჩება.

ორი მძევლის ცხედრის გარდა ყველა ღაზაში დარჩა; აღნიშნული ცხედრები რან გვილისა და სუდთისაკ რინთალაკს ეკუთვნოდათ. თუმცა, ისრაელმა პალესტინის წინააღმდეგობის ჯგუფი ცხედრების გადაცემის პროცესის განზრახ გაჭიანურებაში დაადანაშაულა.

„ჰამასმა“ განაცხადა, რომ ცხედრების გამოყვანის პროცესის სირთულე იმითაა განპირობებული, რომ სხეულები ორწლიანი ომის შედეგად წარმოქმნილი ნანგრევების დიდ გროვებშია მოქცეული. ცხედრების გადაცემასთან დაკავშირებით ანსარიმ აღნიშნა: „როგორც ყოველთვის ვამბობთ, ღაზაში არსებული ლოგისტიკური ვითარება ამ შედეგის მიღწევას ნამდვილად ართულებს.“

პრესსპიკერმა ასევე დასძინა, რომ ცხედრების გადაცემის საკითხი ცეცხლის შეწყვეტის შეთანხმების მეორე ეტაპზე გადასვლისთვის ხელისშემშლელი ფაქტორი არ უნდა გახდეს.

შეთანხმების მეორე ეტაპის მიხედვით, რომელმაც ნოემბერში გაეროს მხარდაჭერა მოიპოვა, ისრაელი რეგიონში დაკავებული პოზიციებიდან ჯარებს გაიყვანს, ღაზას დროებითი ადმინისტრაცია მართავს და ადგილზე საერთაშორისო სტაბილიზაციის ძალები განთავსდებიან.