2022 წლის თებერვალში დაწყებული ომი, აშშ-ის მეთაურობით სამშვიდობო ძალისხმევის მიუხედავად, კვლავ გრძელდება. რუსი და უკრაინელი ოფიციალური პირები ღამის განმავლობაში განხორციელებული თავდასხმების შედეგად დანაკარგების შესახებ იუწყებიან.

უკრაინის ხელისუფლებამ ოთხშაბათს განაცხადა, რომ ღამით რუსეთის სარაკეტო იერიშის შედეგად ორი ადამიანი დაიღუპა და ექვსი დაშავდა.

კიევის ოლქის გუბერნატორმა, მიკოლა კალაშნიკმა აღნიშნა, რომ თავდასხმის შემდეგ სამედიცინო დახმარება კიდევ ოთხმა პირმა მოითხოვა და დასძინა: „ბილოჰოროდკის თემში, თავდასხმის შედეგად ჩვენი ორი მოქალაქე — ერთი მამაკაცი და ერთი ქალი — დაიღუპა“.

„პარტიზანული“ ძალები

ცალკეულ განცხადებაში, დნიპროპეტროვსკის ოლქის გუბერნატორმა ალექსანდრ ვილკულმა თქვა, რომ ქალაქ კრივი-რიჰში ორი ადამიანი დაშავდა. ვილკულმა Telegram-ის საკუთარ არხზე დაწერა: „ჩვენი ქალაქის ერთ-ერთ ინფრასტრუქტურულ ობიექტზე ბალისტიკური რაკეტით დარტყმის შედეგად ორი ადამიანი დაშავდა“.

ამავდროულად, უკრაინული მედია ამტკიცებს, რომ „პარტიზანულმა“ ძალებმა რუსეთის უდმურტეთის რეგიონში მდებარე მეტალურგიულ ქარხანას ელექტროენერგიის მიწოდება ნაწილობრივ შეუწყვიტეს.

რუსეთმა კი განაცხადა, რომ ღამის განმავლობაში უკრაინული დრონების თავდასხმების შედეგად ბრიანსკის ოლქში ერთი, ხოლო სევასტოპოლში ასევე ერთი ადამიანი დაშავდა.

ვორონეჟის ოლქის გუბერნატორმა ალექსანდრ გუსევმა ასევე დაადასტურა, რომ უკრაინის თავდასხმის გამო ნავთობბაზაზე ხანძარი გაჩნდა.

რუსეთის თავდაცვის სამინისტრომ განაცხადა, რომ ღამის განმავლობაში რამდენიმე რეგიონში უკრაინის 75 დრონი ჩამოაგდეს.