კრემლმა განაცხადა, რომ ‘მადლიერია’ თურქეთის იმ მხარდაჭერისთვის, რომელსაც ის რუსეთ-უკრაინის ომის მოგვარების მიმდინარე პროცესში იჩენს.
სამშაბათს გამართულ ბრიფინგზე ჟურნალისტებთან საუბრისას კრემლის პრესმდივანმა დმიტრი პესკოვმა აღნიშნა: „თურქული მხარე კვლავ გვთავაზობს თავის სამსახურს და ამიტომ ჩვენი თურქი მეგობრების მადლიერნი ვართ. ჩვენ მზად ვართ შევქმნათ ყველა პირობა მოლაპარაკებების პროცესის გასაგრძელებლად“.
პესკოვის ეს განცხადებები მოჰყვა ორშაბათს თურქეთის პრეზიდენტ რეჯეფ თაიფ ერდოღანსა და მის რუს კოლეგა ვლადიმერ პუტინს შორის გამართულ სატელეფონო საუბარს. საუბრისას განხილული იყო ომი, რომელიც სამწელიწად-ნახევარზე მეტია გრძელდება, ასევე რეგიონული და გლობალური საკითხები.
სატელეფონო საუბრისას ერდოღანმა აღნიშნა, რომ ანკარა გააგრძელებს ძალისხმევას, რომელიც ხელს შეუწყობს რუსეთ-უკრაინის ომის სამართლიანი და მდგრადი მშვიდობით დასრულებას.
თურქეთის პრეზიდენტის ადმინისტრაციის კომუნიკაციების სამმართველოს ცნობით, ერდოღანმა ხაზი გაუსვა, რომ ანკარა მზადაა წვლილი შეიტანოს დიპლომატიურ ინიციატივებში, რომლებიც გაამარტივებს პირდაპირ კონტაქტს კონფლიქტის მხარეებს შორის და ნიადაგს მოამზადებს მყარი მშვიდობისთვის.
რუსეთ-უკრაინის ომის პირველი კვირებიდან მოყოლებული, თურქეთი მასპინძლობდა საკვანძო დიპლომატიურ კონტაქტებს მოსკოვსა და კიევს შორის. ამ კონტაქტებს შორის არის წელს სტამბოლში განახლებული სამშვიდობო მოლაპარაკებების სამი რაუნდიც. ამ შეხვედრებმა უზრუნველყო ტყვეების ფართომასშტაბიანი გაცვლა და მემორანდუმების პროექტების გაცვლა, რომლებშიც ასახული იყო მხარეთა პოზიციები სამომავლო სამშვიდობო შეთანხმებისთვის.
აშშ-ის მიერ შემოთავაზებული გეგმა
პესკოვი ასევე შეეხო დისკუსიებს უკრაინაში ომის დასრულების მიზნით აშშ-ის მიერ შემუშავებული გეგმის ირგვლივ და თქვა, რომ რუსეთს დოკუმენტის განახლებული ვერსია ჯერ არ მიუღია.
პესკოვმა კვლავ დაადასტურა მოსკოვის რწმენა, რომ დოკუმენტი შეიძლება იყოს ძალიან კარგი საფუძველი მოლაპარაკებებისთვის და აღნიშნა, რომ გეგმა ნაწილობრივ მომზადდა იმ შეთანხმებების შესაბამისად, რომლებიც მიღწეულ იქნა პუტინსა და აშშ-ის პრეზიდენტ დონალდ ტრამპს შორის წლის დასაწყისში ალასკაზე გამართულ სამიტზე.
პესკოვმა გამოხატა რუსეთის დაინტერესება უკრაინაში მიზნების დიპლომატიური გზებით მიღწევის კუთხით და განაცხადა, რომ ისინი ღია არიან მოლაპარაკებებისთვის.
პესკოვმა განაგრძო: „ბუნებრივია, ევროპაში უსაფრთხოების სისტემის განხილვა - ხოლო უსაფრთხოების გარანტიებზე საუბარი მთლიანი უსაფრთხოების სისტემის გარეშე რთულია - ევროპელების მონაწილეობის გარეშე პრაქტიკულად შეუძლებელია. რაღაც ეტაპზე ეს აუცილებლად საჭირო იქნება“.
მან ასევე დასძინა, რომ კრემლი ყურადღებით აკვირდება მედიაში გავრცელებულ ცნობებს არაბთა გაერთიანებული საამიროების დედაქალაქ აბუ-დაბიში რუსი და ამერიკელი მაღალჩინოსნების კონტაქტების შესახებ, თუმცა ამ საკითხზე რაიმე სიახლე არ ყოფილა.
მანამდე Financial Times-მა გაავრცელა ინფორმაცია, რომ აშშ-ის არმიის მდივანი დენ დრისკოლი ორშაბათს ჩავიდა აბუ-დაბიში, რათა ომის დასრულების სამშვიდობო შეთანხმების მიზნით მოლაპარაკებები გაემართა უკრაინის თავდაცვის დაზვერვის ხელმძღვანელსა და რუსულ დელეგაციასთან.
ამერიკელ მაღალჩინოსანსა და შეხვედრის შესახებ ინფორმირებულ ორ პირზე დაყრდნობით გავრცელებული ინფორმაციით, დრისკოლმა და რუსებმა მოლაპარაკებები ორშაბათს ღამით დაიწყეს და იგეგმებოდა მათი გაგრძელება სამშაბათს.
აშშ-ის, უკრაინისა და ევროპელი მოკავშირეების წარმომადგენლები კი კვირას ჟენევაში შეიკრიბნენ და ომის დასრულების წინადადება განიხილეს.
ტრამპმა განაცხადა, რომ აშშ-ის მიერ მომზადებული გეგმა არ იქნებოდა მისი „საბოლოო შეთავაზება“, რადგან ამ წინადადებამ კიევსა და მის მოკავშირეებში შეშფოთება გამოიწვია.
ორშაბათს გვიან ღამით, მოლაპარაკებების შემდეგ, უკრაინის პრეზიდენტმა ვოლოდიმირ ზელენსკიმ განაცხადა, რომ 28 პუნქტისგან შემდგარი გეგმა ახლა „უფრო ნაკლებ პუნქტს“ და „უმეტესად სწორ ელემენტებს“ შეიცავს.
იმავე დღეს რუსეთის პრეზიდენტის თანაშემწემ, იური უშაკოვმა აღნიშნა, რომ მოსალოდნელია აშშ-მა გეგმის განსახილველად მოსკოვთან კონტაქტი „უახლოეს მომავალში“ დაამყაროს, თუმცა ხაზი გაუსვა, რომ მსგავსი მოლაპარაკებებისთვის კონკრეტული შეთანხმება ჯერ არ არსებობს.
