იმ ფონზე, როდესაც ვაშინგტონი განახლებული სამშვიდობო გეგმის პროექტთან დაკავშირებით ზეწოლას განაგრძობს, აშშ-ის პრეზიდენტმა დონალდ ტრამპმა თეთრ სახლში ჟურნალისტებს განუცხადა, რომ რუსეთის პრეზიდენტს, ვლადიმერ პუტინს, უკრაინაში „ომის დასრულება სურს“.
ტრამპმა აღნიშნა, რომ სამშაბათს ღამით ესაუბრა აშშ-ის სპეციალურ დესპანს სტივ ვიტკოფსა და თავის სიძესა და მრჩეველს ჯარედ კუშნერს, რომლებიც მოსკოვში პუტინს შეხვდნენ: „შემიძლია ვთქვა, რომ პრეზიდენტ პუტინთან საკმაოდ კარგი შეხვედრა ჰქონდათ. ვნახოთ. ვერ გეტყვით, რა შედეგი მოჰყვება ამ შეხვედრას“.
ტრამპმა მოსკოვში გამართული მოლაპარაკებები „საკმაოდ კარგ შეხვედრად“ შეაფასა და განაცხადა, რომ რუსეთს კონფლიქტის დასრულებისთვის შეთანხმება „ძლიერ“ სურს: „შეხვედრის შედეგების გარანტიას ვერ მოგცემთ, რადგან ტანგოს საცეკვაოდ ორი ადამიანია საჭირო“.
„კომპრომისი არ არის“
ვიტკოფმა და კუშნერმა მოლაპარაკებები ოთხშაბათს დილით ადრეულ საათებამდე გააგრძელეს, თუმცა შეთანხმების მიმართულებით რაიმე პროგრესის შესახებ არ განცხადებულა.
კრემლმა განაცხადა, რომ არანაირი „კომპრომისი“ არ ყოფილა მიღწეული მათთვის სასიცოცხლოდ მნიშვნელოვან საკითხებზე, მათ შორის ტერიტორიულ დათმობებსა და უკრაინის ნატო-ს წევრობაზე, რასაც მოსკოვი კვლავ „ფუნდამენტურ“ პრობლემურ საკითხად მიიჩნევს.
თეთრი სახლი საჯაროდ ოპტიმიზმს გამოხატავს იმ გეგმასთან დაკავშირებით, რომელმაც უნდა დაასრულოს სიტუაცია, რომელსაც ის მეორე მსოფლიო ომის შემდეგ ევროპაში ყველაზე ცუდ კონფლიქტად აფასებს.
თუმცა, ოთხშაბათს ეს ოპტიმიზმი შემცირდა, როდესაც მოსკოვმა განაცხადა, რომ განახლებული გეგმის ზოგიერთ ელემენტს „მიუღებლად“ მიიჩნევს.
პუტინის საგარეო პოლიტიკურმა მრჩეველმა იური უშაკოვმა, რომელიც შეხვედრებს ესწრებოდა, აღნიშნა, რომ ბოლო კვირებში რუსული ძალების მიერ მოპოვებულმა უპირატესობებმა მოლაპარაკებების ატმოსფერო განსაზღვრა. მან ჟურნალისტებს განუცხადა: „ბოლო კვირებში ბრძოლის ველზე რუსული არმიის წარმატებებმა გავლენა მოახდინა მოლაპარაკებების მიმდინარეობასა და ხასიათზე. ჩვენი ჯარისკაცების სამხედრო წარმატებების წყალობით, ხელი შევუწყვეთ იმას, რომ ჩვენი უცხოელი პარტნიორების შეფასებები მშვიდობის შესაძლო გზებთან დაკავშირებით უფრო პოზიტიური გამხდარიყო“.
