მოსკოვმა 11 მაისამდე დროებითი ცეცხლის შეწყვეტა გამოაცხადა და გააფრთხილა, რომ უკრაინის მიერ ცეცხლის შეწყვეტის დარღვევის შემთხვევაში „შესაბამის და ეფექტურ პასუხს“ გასცემდნენ.

რუსეთის ცალმხრივი ცეცხლის შეწყვეტა ოფიციალურად ამოქმედდა და დაგეგმილია, რომ 11 მაისის შუაღამემდე გაგრძელდება.

მოსკოვმა, რუსეთის პრეზიდენტის ვლადიმერ პუტინის გადაწყვეტილებით, ოთხშაბათს ღამით გამოაცხადა საომარი მოქმედებების დროებით შეწყვეტა გამარჯვების დღის 80-ე წლისთავის აღსანიშნავი ღონისძიებების პერიოდში. გამარჯვების დღე ეროვნული დღესასწაულია, რომელიც 1945 წელს მეორე მსოფლიო ომში ნაცისტური გერმანიის დამარცხებას ეძღვნება.

თუმცა, უკრაინის პრეზიდენტმა ვოლოდიმირ ზელენსკიმ ამ ინიციატივას მხარი არ დაუჭირა.

ზელენსკიმ უცხოელი სტუმრები გააფრთხილა, არ ჩასულიყვნენ მოსკოვში და არ მიეღოთ მონაწილეობა დღესასწაულებში, და განაცხადა, რომ "ამ სტუმრების უსაფრთხოების გარანტიას ვერ მისცემდა".

მოსკოვმა ეს განცხადებები „მუქარად“ შეაფასა.

კრემლის პრესსპიკერმა დიმიტრი პესკოვმა გააფრთხილა, რომ თუ უკრაინული მხარე ცეცხლის შეწყვეტას დაარღვევს, რუსეთის შეიარაღებული ძალები „შესაბამის და ეფექტურ პასუხს“ გასცემენ.