ლიბანის საზოგადოებრივი მაუწყებლის ცნობით, ცეცხლის შეწყვეტის გამოცხადებიდან სულ რამდენიმე საათში, პარასკევს დილით ადრე, ისრაელმა სამხრეთ ლიბანზე საჰაერო იერიშები და საარტილერიო დაბომბვა განახორციელა.
ისრაელის გამანადგურებლებმა დილით ადრე მარჯაიუნის რაიონის დაბა ტულინში მდებარე სახლს დაარტყეს; რეგიონში თავდასხმები საარტილერიო ცეცხლით გაგრძელდა. საზოგადოებრივი მაუწყებლის ინფორმაციით, დამატებითი საჰაერო დარტყმების სამიზნე დაბა ხერბეთ სელმი გახდა.
ტიროსის რაიონში ისრაელის თვითმფრინავებმა მაჯდალ ზუნის გარეუბნებზე მიიტანეს იერიში; ღამის განმავლობაში დაიბომბა რიჰანის ქედებიც ჯეზინის რეგიონში.
აშშ-ის შუამავლობით მიღწეული 10-დღიანი ცეცხლის შეწყვეტის შეთანხმება ძალაში 16 აპრილს შევიდა და მისი დასრულება კვირას იგეგმებოდა. თუმცა, თეთრ სახლში ელჩების დონეზე გამართული შეხვედრების შემდეგ, აშშ-ის პრეზიდენტმა დონალდ ტრამპმა ზავის სამი კვირით გახანგრძლივება დააანონსა.
მანამდე ისრაელის ელჩმა გაეროში, დანი დანონმა განაცხადა, რომ ლიბანთან მიღწეული ზავი „100-პროცენტიანი არ იყო“.
მას შემდეგ, რაც პრეზიდენტმა ტრამპმა ზავის გახანგრძლივება გამოაცხადა, დანონმა ერთ-ერთ ინტერვიუში აღნიშნა: „შეადარეთ დღევანდელი ვითარება იმას, რაც ხდებოდა ცეცხლის შეწყვეტამდე; ნახავთ, რომ მდგომარეობა მნიშვნელოვნად გაუმჯობესდა. ვფიქრობ, მთავარი კითხვაა, აქვს თუ არა ლიბანის მთავრობას უნარი, აღასრულოს ცეცხლის შეწყვეტის ან სამშვიდობო ხელშეკრულების პირობები და მართლაც განახორციელოს სუვერენიტეტი სამხრეთ ლიბანზე“.
ლიბანის ოფიციალური პირების ინფორმაციით, 2 მარტიდან მოყოლებული, ისრაელის თავდასხმების შედეგად ლიბანში 2 200-ზე მეტი ადამიანი დაიღუპა, ხოლო 1 მილიონზე მეტი იძულებით გადაადგილებულ პირად იქცა.
