ღაზის სამხრეთით ისრაელის მიერ განხორციელებული ბოლო თავდასხმების შედეგად სამი პალესტინელი დაიღუპა და ერთი დაშავდა. სამედიცინო წყაროების განცხადებით, ეს თავდასხმები გასულ წელს დადებული ცეცხლის შეწყვეტის შეთანხმების მორიგ დარღვევას წარმოადგენს.
ორშაბათს სააგენტო „ანადოლუს“ (AA) წყაროებმა აცნობეს, რომ ადამიანების დაღუპვა ხან იუნისის ალ-ბალადის რაიონში ისრაელის უპილოტო საფრენი აპარატის მიერ ცეცხლის გახსნას მოჰყვა.
წყაროების თანახმად, ხან იუნისის ალ-ბატინ ალ-სამინის რაიონში ისრაელის მხრიდან გახსნილი ცეცხლის შედეგად პალესტინელი ქალიც დაშავდა. წყაროების განცხადებით, ორივე ლოკაცია იმ ტერიტორიებზე მდებარეობს, საიდანაც ისრაელის ძალები ცეცხლის შეწყვეტის შეთანხმების ფარგლებში გავიდნენ.
თავდასხმები მას შემდეგ მოხდა, რაც ორშაბათს დილით ისრაელის არმიამ ღაზის სხვადასხვა რაიონზე საჰაერო იერიშები მიიტანა და ცეცხლი გახსნა.
2023 წლის ოქტომბრიდან მოყოლებული, სასტიკი იერიშების შედეგად, რომლებმაც რეგიონი თითქმის სრულად გაანადგურა, ისრაელის არმიამ 71 400-ზე მეტი ადამიანი მოკლა (უმეტესობა ქალები და ბავშვები), ხოლო 171 000-ზე მეტი კი დაშავდა.
მიუხედავად მიღწეული ზავისა, არმია თავდასხმებს კვლავ აგრძელებს. ღაზის ჯანდაცვის სამინისტროს მონაცემებით, ცეცხლის შეწყვეტის შეთანხმების ხელმოწერის შემდეგ, ისრაელმა 442 პალესტინელი მოკლა და 1200-ზე მეტი დააშავა.
