აშშ-ის პრეზიდენტმა დონალდ ტრამპმა კუბის მიმართ არსებული პოლიტიკის გადახედვისა და უფრო მკაცრი ზომების მიღების მიზნით უმაღლესი რანგის მინისტრებს მითითება მისცა. ამ კონტექსტში დღის წესრიგში დგას მოგზაურობების შეზღუდვა და ფინანსური სანქციების გამკაცრება.
ტრამპმა ორშაბათს გამოქვეყნებულ მემორანდუმში მინისტრებს მისცა 30 დღიანი ვადა სანქციების შესაფასებლად და უფრო მკაცრი ზომების შესათავაზებლად, კონკრეტულად კი იმ სექტორებზე დარტყმის მიყენებისთვის, რომლებიც სარგებელს აძლევს კუბის მთავრობას, არმიასა და სადაზვერვო სამსახურებს.
ბრძანება მიზნად ისახავს კუბაში ოპოზიციისადმი დამოკიდებულების გადახედვას და ფინანსური ტრანზაქციების შეზღუდვას, რომელიც "კუბელი ხალხის ინტერესების საზიანოდ არაპროპორციულად სარგებელს აძლევს კუბის მთავრობას".
შესაძლო ცვლილებებს შორის არის კუნძულზე ტურისტების ნაკადის შეზღუდვა და საგანმანათლებლო მიზნით მოგზაურობების შეზღუდვა მხოლოდ აშშ-ის მოქალაქეების მიერ ორგანიზებულ და მართულ ჯგუფებთან.
ეს პოლიტიკური ცვლილება შეესაბამება დონალდ ტრამპის წინა განცხადებებს ჰავანასთან დიპლომატიური და ეკონომიკური დაახლოების შეჩერების შესახებ, რომელიც ყოფილი პრეზიდენტების ბარაკ ობამასა და ჯო ბაიდენის დროს დაიწყო.
ბაიდენმა თავისი პრეზიდენტობის ბოლო პერიოდში კუბა აშშ-ის მიერ ტერორიზმის მხარდამჭერი ქვეყნების სიიდან ამოიღო.
ეკონომიკური ემბარგო, მოგზაურობის შეზღუდვები
თეთრი სახლის მიერ გამოქვეყნებული საინფორმაციო ცნობის თანახმად, მემორანდუმი მხარს უჭერს აშშ-ის ეკონომიკური ემბარგოს შენარჩუნებას კუბის მიმართ და უარყოფს ემბარგოს გაუქმების შესახებ გაეროს ჩათვლით საერთაშორისო მოწოდებებს.
ტრამპის ადმინისტრაციამ ასევე გადადგა უფრო ფართო ნაბიჯები, რომლებმაც გავლენა მოახდინეს კუბაზე. მათ შორის არის სავიზო შეზღუდვები კუბელ და უცხოელ თანამდებობის პირებზე, რომლებიც დაკავშირებულნი არიან კუბის საზღვარგარეთულ სამედიცინო მისიებთან, რასაც სახელმწიფო მდივანმა მარკო რუბიომ "იძულებითი შრომა" უწოდა.
გარდა ამისა, აშშ-ში მცხოვრები დაახლოებით 300 000 კუბელისთვის დროებითი დაცვის ზომები გაუქმდა და გაუქმდა დეპორტაციის რისკისგან დაცვის გარანტიები.
კუბის საგარეო საქმეთა მინისტრის მოადგილემ კარლოს ფერნანდეს დე კოსიომ Associated Press-თან ახლახან მიცემულ ინტერვიუში დაგმო ვაშინგტონის მიდგომა და განაცხადა, რომ აშშ ცდილობს დისკრედიტაცია გაუკეთოს კუბის სამედიცინო პროგრამებს და შეცვალოს მისი დადებითი პოლიტიკა კუბელი ემიგრანტების მიმართ.
რუბიო, რომლის ოჯახიც 1959 წლის რევოლუციამდე წავიდა კუბიდან, დიდი ხანია მხარს უჭერს ჰავანას წინააღმდეგ მკაცრი ზომების მიღებას და ამის მიზეზად კუბის მთავრობის ავტორიტარულ მმართველობასა და ადამიანის უფლებების დარღვევას ასახელებს.
