ვრცელდება ინფორმაცია, რომ აშშ-მა ახლო აღმოსავლეთში ავიამზიდ „USS Theodore Roosevelt“-ისა და კიდევ ერთი საზღვაო ქვეითთა დივიზიის გაგზავნის გადაწყვეტილება მიიღო.
ისრაელის ტელეარხ i24-ის მიერ ამერიკელ მაღალჩინოსანზე დაყრდნობით გავრცელებულ ინფორმაციაში აღნიშნულია, რომ აშშ ახლო აღმოსავლეთში მესამე ავიამზიდსა და საზღვაო ქვეითთა მეორე დივიზიას გაგზავნის.
გაზეთ „Yedioth Ahronoth“-ის ცნობით, გადაწყვეტილება აშშ-ის პრეზიდენტ დონალდ ტრამპის იმ მუქარის შემდეგ იქნა მიღებული, რომლის თანახმადაც, ნოემბრის შუალედური არჩევნების შემდეგ ირანზე ხელახალ თავდასხმას განახორციელებენ.
გაზეთ „The Hill“-ის ცნობით, „USS Theodore Roosevelt“-ი ახლო აღმოსავლეთისკენ რეგიონში მყოფი ერთ-ერთი ხომალდის ჩასანაცვლებლად გაემართა.
აშშ ახლო აღმოსავლეთში დაახლოებით 10 ათას დამატებით სამხედროს აგზავნის
აშშ-ის ოფიციალურმა პირებმა, რომლებმაც ინფორმაცია გაზეთ „Wall Street Journal“-ს მიაწოდეს, ასევე განაცხადეს, რომ აშშ-ის თავდაცვის სამინისტრო (პენტაგონი) ახლო აღმოსავლეთში დამატებით 9-დან 10 ათასამდე სამხედროს გაგზავნის.
ოფიციალური პირების თქმით, ავიამზიდმა „USS Theodore Roosevelt“-მა სან-დიეგოს მთავარი პორტი 27 სექტემბერს დატოვა, ხოლო საზღვაო ქვეითების გადამყვანი სამი ამფიბიური ხომალდისგან შემდგარი „USS Makin Island“-ის ამფიბიური მზადყოფნის ჯგუფი გზას 28 სექტემბერს შეუდგა და რეგიონს ნოემბრის ბოლომდე მიაღწევს.
„USS Theodore Roosevelt“-ი ახლო აღმოსავლეთში 2023 წლის 7 ოქტომბრის შემდეგ გაიგზავნა და გარკვეული დროის შემდეგ როტაციისთვის აშშ-ში დაბრუნდა.
აშშ-ს ამჟამად ახლო აღმოსავლეთში ორი ავიამზიდი („USS George H.W. Bush“ და „USS George Washington“) და დაახლოებით 50 ათასი სამხედრო ჰყავს.
