დონალდ ტრამპმა კვირის ბოლოს გაკეთებულ განცხადებაში აღნიშნა, რომ დიზელის ექსპორტის აკრძალვის დაწესების საკითხს ძალიან სერიოზულად განიხილავენ.
აშშ-ის ფინანსთა მინისტრმა სკოტ ბესენტმა კი ხაზგასმით აღნიშნა, რომ ევროპელმა პარტნიორებმა არსებული ვალდებულებებით გათვალისწინებული მიწოდება უნდა დააჩქარონ და მიმდინარე შეფერხებების აღმოსაფხვრელად დამატებითი რესურსები დაუყოვნებლივ მოამზადონ.
ბესენტის განცხადებით, ამერიკელ ფერმერებს, სატვირთო ავტომობილების მძღოლებსა და ბიზნესს ეს ტვირთი მარტო არ უნდა დააწვეს.
თებერვლიდან მოყოლებული ირანში მიმდინარე ომის გამო გაზრდილმა ხარჯებმა და დიზელის დეფიციტმა, რომელიც ნოემბრის შუალედური არჩევნების წინ ამომრჩეველთა მთავარი საზრუნავია, ვაშინგტონში განგაშის საფუძველი გააჩინა.
აშშ კრიტიკულად მნიშვნელოვანი მიმწოდებელია, რომელიც მსოფლიოს დღეში 1,2-დან 1,5 მილიონამდე ბარელ დიზელს აწვდის.
აშშ-ის მხრიდან დიზელის ექსპორტის შესაძლო აკრძალვის შესახებ გაკეთებული განცხადებების შემდეგ, დიდმა ბრიტანეთმა და ევროპელმა პარტნიორებმა პოტენციური აკრძალვის საპასუხოდ კრიზისული შტაბი შექმნეს.
ექსპერტები აფრთხილებენ, რომ მიწოდებაზე შესაძლო აკრძალვის დაწესება სხვა ქვეყნებში ფასებს კიდევ უფრო გაზრდის.
მზარდი წნეხი გლობალურ ბაზრებზე
ბენზინისა და დიზელის გლობალურმა ფასებმა ზრდა თებერვალში ირანში დაწყებული ომის შემდეგ დაიწყო. ჰორმუზის სრუტის ჩაკეტვამ, რომელზეც მსოფლიო ნავთობისა და გაზის თითქმის ერთი მეხუთედი მოდის, ნავთობპროდუქტებზე ფასების მკვეთრი მატება გამოიწვია.
ფასებზე ზეწოლა კიდევ უფრო გააძლიერა დიზელის მნიშვნელოვანი მიმწოდებლის, რუსეთის მიერ ექსპორტზე დაწესებულმა აკრძალვამაც.
