თურქეთის საგარეო საქმეთა სამინისტრომ ღრმა მწუხარება გამოთქვა ჩრდილოეთ კვიპროსის თურქული რესპუბლიკის გირნეს პორტიდან მერსინის თაშუჯუს პორტისკენ მიმავალი სამგზავრო გემის გადაბრუნების შედეგად ადამიანების დაღუპვის გამო.

სამინისტრომ გირნეს სანაპიროსთან სამგზავრო გემის ჩაძირვასთან დაკავშირებით წერილობითი განცხადება გაავრცელა.

განცხადებაში ნათქვამია: „ღრმა მწუხარებას გამოვთქვამთ მომხდარი ტრაგედიის გამო, რა დროსაც ჩკთრ-ის გირნეს პორტიდან მერსინის თაშუჯუს მიმართულებით მიმავალი სამგზავრო გემის გადაბრუნებას მსხვერპლი მოჰყვა. დაღუპულთა ოჯახებს, ჩვენს ერსა და ჩკთრ-ის მოსახლეობას ვუსამძიმრებთ და გამძლეობას ვუსურვებთ“.

განცხადებაში აღნიშნულია, რომ თურქეთი სრულ მხარდაჭერას უცხადებს ჩკთრ-ის ხელისუფლების მიერ წარმოებულ ინტენსიურ სამძებრო-სამაშველო ოპერაციას. ამასთან, სამაშველო ღონისძიებებში თურქეთის მხრიდან ორი ვერტმფრენი, ორი კატარღა, მყვინთავთა ჯგუფი და სამხედრო-საზღვაო ძალების ორი ხომალდია ჩართული.

განცხადებაში ასევე ხაზგასმულია, რომ დამატებითი მსხვერპლის თავიდან არიდებისა და დაკარგული პირების პოვნის მიზნით, სამუშაოები ჩკთრ-ის ხელისუფლებასთან მჭიდრო კოორდინაციითა და თანამშრომლობით გრძელდება.

გირნეს სანაპიროსთან გადაბრუნებული გემი

ჩკთრ-ის გირნეს პორტსა და მერსინის თაშუჯუს პორტს შორის მოძრავმა სწრაფმავალმა სამგზავრო კატარღამ, სახელწოდებით „Filo Jet“, შუადღისას გირნედან გასვლიდან მალევე, წინა ნაწილიდან წყლის აღება დაიწყო.

გემი გირნეს პორტში დაბრუნების მცდელობისას გადაბრუნდა. ბორტზე მყოფი 267 პირიდან (259 მგზავრი და ეკიპაჟის 8 წევრი) 241 ადამიანის გადარჩენა მოხერხდა, ხოლო 8 პირი დაიღუპა.

ამ დროისთვის დაკარგული 18 ადამიანის სამძებრო-სამაშველო სამუშაოები გრძელდება.