ყოფილი პრემიერ-მინისტრი ჯუზეპე კონტე ასევე მძიმე ეკონომიკური და დიპლომატიური სანქციების დაწესებას მოითხოვს.

იტალიის ოპოზიციური „ხუთი ვარსკვლავის მოძრაობის“ ლიდერმა ჯუზეპე კონტემ ხუთშაბათს გაკეთებულ განცხადებაში, ღაზაზე თავდასხმების გამო, ისრაელის წინააღმდეგ იარაღის სრული ემბარგოს დაწესებისკენ მოუწოდა.

„მხოლოდ 24 საათში 100-ზე მეტი დაღუპული. ორ კვირაში მოკლული 300-ზე მეტი ბავშვი,“ - განაცხადა კონტემ X-ზე გამოქვეყნებულ პოსტში და აღნიშნა, რომ ისრაელი აგრძელებს სამედიცინო დაწესებულებებისა და სახლების სამიზნედ ქცევას.

კონტემ თქვა, რომ იტალია და ევროპა ისრაელის პრემიერ-მინისტრის, ბენიამინ ნეთანიაჰუს მთავრობის მიერ ჩადენილი სისასტიკის ფონზე დუმილს ინარჩუნებენ. მან ასევე გააკრიტიკა ევროპარლამენტის პოზიცია და აღნიშნა, რომ მხოლოდ „შეშფოთების“ გამოხატვა „უაზროა“.

„ისრაელს უნდა დაუწესდეს იარაღის სრული ემბარგო, ხოლო მთავრობის წარმომადგენლებისა და მათი მხარდამჭერების წინააღმდეგ მძიმე ეკონომიკური და დიპლომატიური სანქციები უნდა ამოქმედდეს,“ - განაცხადა 60 წლის პოლიტიკოსმა, რომელიც პრემიერ-მინისტრის პოსტს 2018-2021 წლებში იკავებდა.

იტალიის ჩრდილოეთით მდებარე ქალაქ მილანში კი ასობით ადამიანმა ღაზაში პალესტინელი ჟურნალისტების მკვლელობის გასაპროტესტებლად აქცია გამართა.

ისრაელის მიერ 2023 წლის ოქტომბრიდან ღაზაში განხორციელებულ თავდასხმებს 50,500-ზე მეტი პალესტინელი ემსხვერპლა, რომელთა უმრავლესობა ქალი და ბავშვია.

გასულ ნოემბერში, სისხლის სამართლის საერთაშორისო სასამართლომ (ICC) ისრაელის პრემიერ-მინისტრ ნეთანიაჰუსა და თავდაცვის ყოფილი მინისტრის იოავ გალანტის წინააღმდეგ ღაზაში ჩადენილი სავარაუდო ომის დანაშაულებისა და კაცობრიობის წინააღმდეგ დანაშაულების გამო დაკავების ორდერები გასცა.

ისრაელი ასევე დგას გენოციდის ბრალდების წინაშე მართლმსაჯულების საერთაშორისო სასამართლოში (ICJ) ღაზაში მიმდინარე ომის გამო.